آرٹس کے مضامین کی حقیقت اور پوزیشن ہولڈرز کی دلچسپ باتیں

آج ہمارے معاشرے میں آرٹس کے مضامین کے حوالے سے جو سوچ تیزی سے پروان چڑھ رہی ہے وہ یہ ہے کہ ان مضامین کو پڑھ کر حصولِ زر کے معاملے میں تیزی اور ترقی حاصل نہیں کی جاسکتی اور یہی وجہ ہے کہ ان مضامین کا انتخاب کرنے والے طلبا کی تعداد میں روز بروز کمی واقع ہوتی جارہی ہے- لیکن حقیقت یہ ہے کہ یہی آرٹس کے مضامین انسان کو زندگی گزارنے کا سلیقہ اور قرینہ سکھاتے ہیں اور ساتھ ہی اسے اپنی تاریخ اور ادب سے واقفیت بھی فراہم کرتے ہیں- اس لیے آرٹس کے مضامین کو کسی طور بھی دوسرے مضامین کے مقابلے میں کم درجہ نہیں دیا جاسکتا- گزشتہ روز کراچی انٹرمیڈیٹ بورڈ نے آرٹس کے سالانہ امتحانات ریگولر و پرائیوٹ گروپ برائے 2014 کے نتائج کا اعلان کیا- ان نتائج میں پوزیشن حاصل کرنے والے ان طلبا سے ہماری ویب نے خصوصی بات چیت کی جنہوں نے تمام انتشار٬ افتراق٬ لسانیت اور فرقہ بندیوں کو بھلا کر صرف کتاب سے رشتہ جوڑا اور کامیابیاں سمیٹیں-

سب سے پہلے ہم بات کرتے ہیں پہلی پوزیشن حاصل کرنے والی خوش نصیب طالبہ عشناﺀ اسلم سے٬ عشناﺀ نے 1100 میں سے 918 نمبر حاصل کر کے اے ون گریڈ اپنے نام کیا-

ہماری ویب: کالج کا نام؟
عشناﺀ اسلم= فیڈرل گورنمنٹ گرلز انٹر کالج-
 

ہماری ویب: پوزیشن حاصل کرنے پر کیا احساسات ہیں؟
عشناﺀ اسلم= بہت خوشی ہو رہی ہے٬ آج اس بات پر یقین پختہ ہوگیا کہ محنت کریں تو پھل ضرور ملتا ہے- اﷲ تعالیٰ کا شکریہ ادا کرنا چاہتی ہوں اور ساتھ ہی اپنے والدین اور اساتذہ کا بھی جن کی محنت اور دعاؤں کی وجہ سے آج میں اس مقام پر ہوں-

ہماری ویب: آپ نے آرٹس کا انتخاب کیا٬ اس کا بنیادی مقصد کیا تھا؟
عشناﺀ اسلم= مجھے ہوم اکنامکس میں دلچسپی تھی جبکہ میں نے میٹرک سائنس سے ہی کیا تھا-

ہماری ویب: آپ کا پسندیدہ مضمون کونسا تھا؟ اور ناپسندیدہ کونسا؟
عشناﺀ اسلم= ناپسندیدہ تو کوئی بھی نہیں البتہ سب سے زیادہ ہوم اکنامکس پسند ہے-

ہماری ویب: کوئی ایسے عوامل جو پڑھائی میں رکاوٹ کا باعث بنے؟
عشناﺀ اسلم= کوئی خاص مشکل تو پیش نہیں آئی لیکن لوڈشیڈنگ نے تھوڑا بہت متاثر کیا-

ہماری ویب: عموماً دیکھا گیا ہے کہ لڑکیاں پوزیشن حاصل کرنے میں کامیاب رہتی ہیں٬ لڑکے ایسا کیوں نہیں کرپاتے؟ آپ کی اس بارے میں کیا رائے ہے؟
عشناﺀ اسلم= لڑکیاں زیادہ محنت کرتی ہیں جبکہ لڑکے پڑھائی کے معاملے تھوڑے لاپراوہ ہوتے ہیں جبکہ چند ایک پر کچھ ذمہ داریاں بھی ہوتی ہیں-