خاتون نے چیتے کو موت کے گھاٹ اتار دیا

بعض اوقات خواتین بھی ایسے خوفناک کارنامے سرانجام دے جاتی ہیں جنہیں دیکھ کر مرد حضرات بھی حیرت کے مارے اپنی انگلیاں دانتوں تلے دبا لیتے ہیں- ایسا ہی ایک کانامہ سرانجام دیا ہے بھارت کی ریاست اتراکھنڈ کے ردرپرياگ ضلع کی ایک خاتون نے جس نے خود پر حملہ کرنے والے چیتے کو اکیلے ہی مار گرایا۔

کملا دیوی نامی خاتون نے درانتی اور کدال کے وار کر کے چیتے کو موت کے گھاٹ اتار دیا لیکن اس لڑائی کے دوران خود بھی وہ شدید زخمی ہوگئی اور اسے مقامی ہسپتال میں داخل کروایا گیا ہے۔
 

واقعے کی تفصیلات بتاتے ہوئے 54 سالہ کملا دیوی بتاتی ہیں کہ جب وہ اتوار کی صبح قریب میں ہی واقع ایک نالے سے اپنے کھیت میں پانی دینے گئی تو اس وقت جھاڑیوں میں چھپے چیتے نے ان پر حملہ کر دیا۔

“ اس وقت میرے پاس صرف درانتی اور کدال تھی اور میں نے اسی سے چیتے پر وار کرنا شروع کردیے جس کی وجہ سے چیتے کے دانت ٹوٹ گئے۔ اور چیتے کے ساتھ میری یہ لڑائی تقریبا نصف گھنٹے جاری رہی، جس کے بعد مجھے پتہ چلا کہ چیتا مرچکا ہے-“

چیتے کو موت کے گھاٹ اتارنے کے بعد جب وہ اپنے گاؤں پہنچیں تو وہ خون سے لت پت تھیں- گاؤں والوں نے انہیں فوراً مقامی ہسپتال پہنجایا۔

کملا کا علاج کرنے والے ڈاکٹر عبدالرؤف کا کہنا ہے کہ “کملا کے بائیں ہاتھ کی ہڈی باہر نکل گئی ہے جبکہ دونوں بازوؤں کی کہنیاں بھی ٹوٹ چکی ہیں۔ اس کے علاوہ سر پر بھی زخم آئے ہیں اور پورے جسم پر کاٹنے کے نشاننات اور خراشیں موجود ہیں ۔ تاہم ان کی حالت خطرے سے باہر ہے۔‘