اگر آپ کو وزیراعظم بنا دیا جائے تو ----

اچھے انجینئر بہترین معیشت اور ملک کے مضبوط بنیادی ڈھانچے کے ضامن ہوتے ہیں- انجینئرنگ کرنا بھی کوئی آسان کام نہیں اور اس شعبے کو اپنی زندگی مقصد بنانے والوں کو پہلے روز سے ہی ہر قدم پر نمایاں کامیابیاں حاصل کرنی ہوتی ہیں- اور تب ہی یہ لوگ مستقبل میں ایک بہترین انجینئر بن کر ملک و قوم کی ترقی میں اپنا اہم کردار ادا کرسکتے ہیں- مستقبل کے چند انجینئرز کی ایک مثال اس وقت دیکھنے میں آئی جب گزشتہ روز کراچی انٹرمیڈیٹ بورڈ نے پری انجینئرنگ کے سالانہ امتحانات برائے 2014 کا اعلان کرتے ہوئے ان امتحانات میں ٹاپ پوزیشن حاصل کرنے والے طالبعلموں کو ان کی کامیابی پر نہ صرف شاباش دی بلکہ ان کی کاوشوں کو سراہا بھی- ہماری ویب نے ان پوزیشن ہولڈرز سے خصوصی بات چیت کی جس میں مختلف سوالات کیے گئے- ان سوالات و جوابات کا مقصد جہاں ایک جانب ان پوزیشن ہولڈرز کو آئیڈیل کے طور پر پیش کرنا ہے وہیں دوسری طرف دیگر طالبعلموں کی رہنمائی کرنا بھی ہے-

سب سے پہلے بات کرتے ہیں پہلی پوزیشن حاصل کرنے والی خوش نصیب طالبعلم محمد سنین حسنین سے جنہوں نے 1100 میں سے 992 نمبر حاصل کر کے اے ون گریڈ حاصل کیا-

ہماری ویب: کالج کا نام؟
محمد سنین حسن= دہلی گورنمنٹ کالج-
 

ہماری ویب: پوزیشن حاصل کرنے پر کیا احساسات ہیں؟
محمد سنین حسن= اﷲ تعالیٰ کا لاکھ لاکھ شکر ہے اس ذات نے مجھے میری امیدوں سے بڑھ کر نوازا- اس کے ساتھ ساتھ میرا اساتذہ اور میرے والدین کا بھی بہت بڑا کردار ہے میری اس کامیابی میں-

ہماری ویب: کیا اس سے قبل بھی آپ نے کسی کلاس میں پوزیشن حاصل کی ہے؟
محمد سنین حسن= بورڈ کی سطح پر میں نے پہلی مرتبہ پوزیشن حاصل کی ہے- اور پہلی بار ہی پہلی پوزیشن حاصل کرلی-

ہماری ویب: کیا کالج روزانہ جاتے تھے؟
محمد سنین حسن= جی ہاں میں روزانہ جاتا تھا-

ہماری ویب: کیا کوچنگ بھی جوائن کیا ہے؟
محمد سنین حسن= نہیں کوچنگ جوائن نہیں کی- کالج میں ہی بھرپور پڑھائی ہوتی تھی- جو لوگ کہتے ہیں کہ گورنمنٹ کالج میں پڑھائی نہیں ہوتی تو یہ غلط تاثر ہے- اور کالج کے اساتذہ نے میرے ساتھ بھرپور تعاون کیا-

ہماری ویب: آپ نے پری انجنئیرنگ کا انتخاب کیوں کیا؟
محمد سنین حسن= میں میکینکل انجنئیر بننا چاہتا ہوں اسی لیے اس مضمون کا انتخاب کیا-

ہماری ویب: آپ کے والدین کیا کرتے ہیں؟
محمد سنین حسن= میرے والد کا اسکول ہے اور میرے والد نے خود بھی الیکٹریکل انجنئیرنگ کی ہے این ای ڈی سے- اس کے علاوہ میرے دو بھائی اور ایک بہن بھی این ای ڈی سے انجنئیرنگ کر رہے ہیں جبکہ ایک بہن نے پری میڈیکل کا انتخاب کیا اور اب وہ بی ڈی ایس کر رہی ہیں-

ہماری ویب: آپ کی نظر میں ملک کا سب سے بڑا مسئلہ کیا ہے؟
محمد سنین حسن= لوگ ملک کے لیے مخلص نہیں ہیں- صرف ذاتی مفاد کے بارے میں سوچتے ہیں- اگر ہم خود ٹھیک ہوجائیں تو ملک ترقی کی راہ پر گامزن ہوجائے گا-

ہماری ویب: اگر آپ کو ایک دن کے لیے وزیر اعظم بنا دیا جائے تو پہلا کام کیا کریں گے؟
محمد سنین حسن= تعلیمی اداروں میں سے سیاست کا خاتمہ کردوں گا اور ساتھ ہی پیپر پیٹرن بھی تبدیل کردوں گا-