جرمنی کے کھیت میں پراسرار دائرے

حال ہی میں جرمن صوبے باویریا میں چند ایسے پراسرار دائروں کی موجودگی کا انکشاف ہوا ہے جو کہ انتہائی ترتیب کے ساتھ بنے ہوئے ہیں اور ڈھائی سو فٹ کے رقبے پر محیط ہیں۔ اور یہ پراسرار دائرے اس وقت ہزاروں لوگوں کی توجہ کا مرکز ہیں-

یہ پراسرار جرمنی کے جنوبی صوبے باویریا کے شہر وائلہائم کے نزدیک واقع ایک گندم کے کھیت میں بنے ہوئے ہیں-
 

یہ پراسرار دائرے گزشتہ ہفتے اس وقت منظرِ عام پر آئے جب گرم ہوا کے غبارے میں اڑنے والے ایک شخص کی نگاہ انتہائی بلندی سے ان خوبصورت دائروں پر پڑی۔ اس شخص نے دائروں کی تصاویر کھینچنے کے بعد انہیں سوشل میڈیا پر شائع کردیا-اس کا نتیجہ یہ نکلا کہ ہزاروں لوگ وائلہائم کے قریب واقع اس مقام پر پہنچنا شروع ہو گئے۔

پراسرار دائروں کا حامل یہ کھیت ایک خلائی رصدگاہ کے قریب واقع ہے- خلائی رصد گاہ کے دائروں کے قریب ہونے کی وجہ سے لوگ یہ سوالات بھی اٹھا رہے ہیں کہ انتہائی درستگی کے ساتھ بنے 75 میٹر کے دائروی رقبے میں موجود یہ ڈیزائن انسانی کارنامہ ہے یا پھر کسی خلائی مخلوق کا۔

اس مقام پر آنے والے لوگ نہ صرف ان دائروں کو کی تصاویر اتار رہے ہیں بلکہ یہاں ناچ گا کر اپنی خوشی کا اظہار بھی کر رہے ہیں-