سال 2014: قیمتی ترین برانڈز٬ کون کہاں جا پہنچا؟

دنیا کی مختلف قیمتی ترین اشیاﺀ کے بارے میں جب بھی آپ مطالعہ کرتے ہیں تو وہ عموماً سونے یا پھر ہیروں سے آراستہ ہوتی ہیں اور یہی چیز ان کو قیمتی بناتی ہے- لیکن آج ہم دنیا کے سب سے قیمتی برانڈز کے بارے میں بتائیں گے جن کا نام ہی ان کی مصنوعات کی کامیابی اور اعتماد کی ضمانت ہوتا ہے٬ اور یہی چیز ان کو قیمتی بھی بناتی ہے- اس آرٹیکل میں آپ جانیں گے سال 2014 کے دنیا کے قیمتی ترین کے بارے میں اور ساتھ ہی یہ بھی سال 2013 میں ان کی پوزیشن کیا تھی؟
 

گوگل
گزشتہ سال دنیا کے قیمتی ترین برانڈز کی فہرست میں دوسری پوزیشن حاصل کرنے والی کمپنی گوگل نے اس سال ایپل کو شکست دے کر اس فہرست میں پہلی پوزیشن اپنے نام کر لی- ایک سال کے دوران گوگل اثاثوں میں 40 فیصد اضافہ ہوا جس کے بعد اب گوگل کے اثاثوں کی مالیت 158.84 ارب ڈالر ہے-

ایپل
ایپل جسے پہلے موبائل فونز کی انڈسٹری میں سام سنگ نے شکست دی اور اب گوگل سے شکست کھا کر قیمتی ترین برانڈز کی اس فہرست میں دوسری پوزیشن پر ہے- گزشتہ سال ایپل دنیا کے قیمتی ترین برانڈز کی فہرست میں پہلے نمبر پر براجمان تھا- ایک سال کے دوران ایپل کے اثاثوں میں 20 فیصد کمی دیکھنے میں آئی اور اس وقت ایپل کے اثاثوں کی مالیت 147 ارب ڈالر ہے-

آئی بی ایم ٹیکنالوجی
قیمتی ترین برانڈز کی فہرست میں تیسری پوزیشن پر آئی بی ایم ٹیکنالوجی ہے جبکہ گزشتہ سال بھی آئی بی ٹیکنالوجی کو تیسری پوزیشن ہی حاصل تھی٬ جبکہ اس کے اثاثوں میں 4 فیصد کی کمی بھی واقع ہوئی- اس وقت آئی بی ایم کے اثاثوں کی مالیت 107 ارب ڈالر ہے-

مائیکرو سوفٹ
دنیا کی امیر ترین شخصیت بل گیٹس کی کمپنی مائیکرو سوفٹ قیمتی ترین برانڈز کی فہرست میں چوتھے نمبر پر ہے- البتہ اس سال مائیکرو سوفٹ کی رینکنگ میں بہتری دیکھنے میں آئی ہے کیونکہ گزشتہ سال مائیکرو سوفٹ ساتویں پوزیشن پر تھا- ایک سال کے دوران مائیکرو سوفٹ کے اثاثوں میں 29 فیصد ہوا اور اب اس کے اثاثوں کی مالیت 90.2 ارب ڈالر ہے-

میکڈونلڈ
اس سال میکڈونلڈ بھی ایک درجہ کمی کے ساتھ سال 2014 کے قیمتی ترین برانڈز کی فہرست میں پانچویں پوزیشن پر براجمان ہے جبکہ گزشتہ سال میکڈونلڈ کو چوتھی پوزیشن حاصل تھی- ایک سال کے دوران میکڈونلڈ کے اثاثوں میں 5 فیصد کمی واقع ہوئی جس کے بعد اب میکڈونلڈ کے اثاثے 85 ارب ڈالر رہ گئے ہیں-

کوکا کولا
سافٹ ڈرنکس بنانے والی کمپنی کوکا کالا اس سال چھٹی پوزیشن پر ہے اور اس کی رینکنگ میں بھی ایک درجے کی کمی واقع ہوئی ہے- کوکا کالا کمپنی گزشتہ سال قیمتی ترین برانڈز کی فہرست میں پانچویں پوزیشن پر تھی- دلچسپ بات یہ ہے کہ ایک سال کے دوران کوکا کولا کے اثاثوں میں 3 فیصد کا اضافہ بھی دیکھنے میں آیا ہے جس کی بدولت اس کے اثاثے 80 ارب ڈالر تک جا پہنچے ہیں-

ویزا کریڈٹ کارڈز
اس سال ویزا کریڈٹ کارڈز کی رینکنگ میں بہتری آئی اور وہ دو درجے اوپر آنے کے بعد مذکورہ فہرست ساتویں نمبر پر ہے جبکہ گزشتہ سال یہ کمپنی نویں پوزیشن پر تھی- ایک سال کے دوران اس کے اثاثوں میں 41 فیصد کا اضافہ دیکھنے میں آیا جو کہ ایک بڑی کامیابی ہے- اس وقت ویزا کریڈٹ کے اثاثوں کی مالیت 79 ارب ڈالر ہے-

اے ٹی اینڈ ٹی ٹیلی کام
دنیا کے قیمتی ترین برانڈز کی فہرست میں اے ٹی اینڈ ٹی ٹیلی کام اس سال 2 درجے نیچے آئی ہے جبکہ اس کے اثاثوں میں 3 فیصد کا اضافہ بھی ہوا ہے- سال 2014 کی فہرست میں یہ کمپنی آٹھویں پوزیشن پر ہے جبکہ گزشتہ سال چھٹے نمبر پر تھی- اس کمپنی کے اثاثوں کی مالیت 77 ارب ڈالر ہے-

مالبورو ٹوبیکو
دنیا کا نواں قیمتی ترین برانڈ مالبورو ٹوبیکو ہے اور اس کے درجات میں بھی تنزلی دیکھنے میں آئی ہے- گزشتہ سال یہ کمپنی آٹھویں نمبر پر تھی جبکہ اس سال ایک درجہ نیچے آنے کے بعد یہ نویں پوزیشن پر ہے- ایک سال کے دوران اس کمپنی کے اثاثوں میں 3 فیصد کی کمی بھی واقع ہوئی ہے جس کے بعد اب اس کے اثاثوں کی مالیت 67 ارب ڈالر ہے-