پانچ پاکستانی کرکٹرز پر بھاری جرمانہ عائد

پاکستان کرکٹ بورڈ نے سپاٹ فکسنگ کے الزام میں تاحیات پابندی کا شکار دانش کنیریا کے ساتھ ہیوسٹن میں ٹی ٹوئنٹی ٹورنامنٹ میں حصہ لینے پر پانچ کھلاڑیوں پر فی کس 5,000 ڈالر جرمانہ عائد کیا ہے۔

گزشتہ ماہ ہیوسٹن میں کھیلے گئے فرینڈ شپ کپ ٹی ٹوئنٹی ٹورنامنٹ میں فاسٹ باؤلر وہاب ریاض، آل راؤنڈر عبدالرزاق، مڈل آرڈر بلے باز فواد عالم اور اوپننگ بلے باز ناصر جمشید اور شاہ زیب حسن نے شرکت کی -
 

پاکستان کرکٹ بورڈ کے مطابق ان کرکٹرز نے ٹورنامنٹ میں حصہ لینے کے لیے اجازت نہیں لی تھی۔ اور اس وجہ سے ان تمام پر فی کس پانچ ہزار ڈالر یعنی 500,000 روپے جرمانہ عائد کیا گیا ہے۔

دلچسپ بات یہ ہے کہ 11 سے 13 اپریل تک ہونے والے اس ٹی ٹوئنٹی ٹورنامنٹ میں پاکستان کرکٹ بورڈ کے ڈائریکٹر مارکیٹنگ بدر رفاعی بھی موجود تھے لیکن انھیں صرف متنبہ کیا گیا ہے۔

گزشتہ ماہ، پی سی بی نے ٹورنامنٹ میں کھلاڑیوں کی شرکت کی تحقیقات کے حوالے سے تین رکنی کمیٹی تشکیل دی تھی۔

یہ کمیٹی میں ڈومیسٹک کرکٹ ڈائریکٹر انتخاب عالم، جنرل منیجر برائے نگرانی اور سلامتی اعظم خان اور بین الاقوامی کرکٹ منیجر عثمان والا مشتمل تھی۔

ان تمام پانچ کھلاڑیوں نے کمیٹی کے سامنے ایونٹ میں شرکت کا اعتراف کیا،لیکن کھلاڑیوں کا یہ بھی کہنا تھا کہ انہیں آئی سی سی کے قواعد و ضوابط کے مطابق پی سی بی سے پیشگی منظوری کا انہیں علم نہیں تھا۔