ٹوئنٹی ٹوئنٹی عالمی کپ، پاکستان ہاٹ فیورٹ کیوں؟

پاکستانی ٹیم میں کپتان محمد حفیظ، شاہد آفریدی، کامران اکمل، سعید اجمل، عمر گل اور شعیب ملک ایسے کھلاڑی ہیں جو اس طرز کے تاحال ہونیوالے چاروں عالمی کپ کھیل چکے ہیں۔

ڈوئچے ویلے کی رپورٹ کے مطابق بنگلہ دیش میں اتوار کو شروع ہونیوالےآئی سی سی ٹوئنٹی ٹوئنٹی عالمی کپ کے لیے پاکستان کو فیورٹ قرار دیا جا رہا ہے۔ ماضی کے نامور اسپنر مشتاق احمد کا کہنا ہے کہ پاکستانی ٹیم یہ ٹورنامنٹ جیتنے کے لیے ہاٹ فیورٹ ہے۔ مشتاق احمد کہتے ہیں کہ پاکستان کو دنیا کے بہترین اسپنرز کی خدمات حاصل ہیں اور بنگلہ دیش میں ٹوئنٹی ٹوئنٹی میں اسپنرز کا کردار ہی فیصلہ کن ہوگا۔
 

مشتاق احمد، جو انیس سو بانوے کا انگلینڈ کے خلاف تاریخی ورلڈ کپ فائنل جیتنے والی عمران خان کی پاکستانی ٹیم کے رکن تھے، کا کہنا ہے کہ پاکستان کو بیٹنگ میں منصوبہ بندی بڑی ہوشیاری سے کرنا ہوگی کیونکہ فاسٹ باؤلرز پر ہونیوالی تنقید کے باوجود پاکستانی باؤلنگ اٹیک ایک سو چالیس سے پچاس رنز کا دفاع کرسکتا ہے۔

پاکستانی کپتان محمد حفیظ کا کہنا ہے کہ لیفٹ آرم سپنر ذوالفقار بابر بنگلہ دیش کی وکٹوں پر پاکستان کا اہم ہتھیار ہوں گے۔ انہوں نے کہا کہ یہ درست ہے کہ ٹیم میں رضا حسن اور عرفان جیسے باؤلرز اب نہیں مگر کھلاڑی آتے جاتے رہتے ہیں اور ذوالفقار بابر ٹیم کی جیت میں کلیدی کردار ادا کرنے کی اہلیت رکھتے ہیں۔

پاکستان کو ٹورنامنٹ کے گروپ ٹو میں جسے ’گروپ آف ڈیتھ‘ قرار دیا جا رہا ہے، دفاعی چمپین ویسٹ انڈیز، آسٹریلیا اور بھارت جیسی صف اوّل کی ٹیموں کا سامنا ہوگا۔

اس ضمن میں ڈوئچے ویلے سے بات کرتے ہوئے مشتاق احمد کا کہنا تھا کہ بڑے ٹورنامنٹ جیتنے کے کے لیے بڑی ٹیموں کو ہرانا ہی پڑتا ہے، ایشیا کپ کھیلنے کے بعد پاکستانی کرکٹرز کو ڈھاکہ کی پچ، باؤنڈری اور موسم سے مکمل ہم آہنگی ہو چکی ہے اور ابتدا میں پاکستان اگر بھارت اور آسٹریلیا جیسی ٹیموں کو ہرا دے تو کھلاڑیوں کے حوصلے اگلے میچوں کے لیے بلند ہوجائیں گے۔