ہماری ویب کے کالم نگاروں کے اعزاز میں ظہرانہ

معروف کالمسٹ عطاالحق قاسمی نے ایک موقع پر کہا تھا کہ “ کالم نگاری نہ صرف ایک فن اور مختلف معاملات پر اپنے خیالات کے اظہار کا ذریعہ ہے بلکہ یہ معاشرے میں ہونے والی نا انصافیوں٬ سیاستدانوں کے ناعاقبت اندیش اقدامات اور دیگر معاملات کے خلاف آواز بلند کرنے کے ضمن میں اپنا حصہ ڈالنے کے مترادف بھی ہے جو یہ ثابت کرتی ہے کہ آپ ظلم و زیادتیوں پر خاموش نہیں ہیں- اور ان کے خلاف منہ میں زبان٬ ہاتھ میں طاقت اور وسیع نظر رکھتے ہیں“-

کچھ لوگوں کو کالم لکھنے کا شوق ہوتا ہے تو کچھ کالم نگاری کے ذریعے اپنا ڈپریشن یا ذہنی دباؤ کم کرتے ہیں٬ لیکن وجہ جو بھی ہو یہ کالم قارئین کے لیے ضرور معلومات کا ایک اہم ذریعہ بنتے ہیں- معاشرے میں کالم نگاروں کو انتہائی احترام کی نگاہ سے دیکھا جاتا ہے٬ کیونکہ کالم نگاروں کے قلم اگر کسی کے علم میں اضافہ کرتے ہوئے دکھائی دیتے ہیں تو وہی دوسری جانب معاشرے میں ہونے والے مظالم کے خلاف بغاوت کرتے بھی نظر آتے ہیں-
 

ہماری ویب پر بھی کالم نگاروں کی ایک بڑی تعداد موجود ہے اور جہاں ایک جانب کالم لکھنے والے موجود ہیں وہیں دوسرے طرف ان کالموں کو پڑھنے والے بھی انگنت ہیں جن کے مثبت تبصرے اور آرا ان کالم نگاروں کی حوصلہ افزائی کا باعث ہوتے ہیں-

ہماری ویب اپنے آغاز سے ہی اپنے محترم کالم نگاروں کی حوصلہ افزائی کے لیے کئی اقسام کے اقدامات کرتی آئی ہے اور اسی سلسلے میں گزشتہ روز بھی ہماری ویب نے اپنے کالم نگاروں کے اعزاز میں ایک پروقار تقریب کا انعقاد کیا- اس تقریب کی سربراہی٬ ہماری ویب کے بانی جناب ابرار احمد صاحب نے اپنی ٹیم کے ہمراہ کی-

اس تقریب میں شرکت کرنے والے کالم نگاروں کا تعلق زندگی کے مختلف شعبوں سے تھا اور اپنی بےپناہ مصروفیات کے باوجود تقریب میں شرکت کر کے ہماری ویب سے اپنی محبت و عقیدت کا ثبوت دیا-

تقریب میں جہاں ایک جانب معاشرتی مسائل پر گفتگو کی گئی وہی دوسری طرف نیٹ پر کالم پڑھنے والوں کو درپیش آنے والے مسائل کو بھی زیر بحث لایا گیا اور اس ضمن میں تمام کالم نگاروں نے اپنی قیمتی آرا سے نوازا-