دلچسپ اور حیرت انگیز الیکٹرانکس ایجادات

لاس ویگاس میں دلچسپ اور حیرت انگیز الیکٹرانکس ایجادات اور آلات کا میلہ سج چکا ہے۔ پانچ جنوری کو ہونے والے میڈیا شو میں کمپنیوں نے اپنے انوکھے آلات اور مصنوعات کو پیش کیا۔ اس نمائش میں رکھے کچھ خاص برقی تحفوں کی چند تصاویر اور تفصیل ڈان نے شائع کی ہیں جو کہ یہاں ہماری ویب کے قارئین کے لیے بھی پیش کی جارہی ہیں۔

امریکی شہر لاس ویگاس میں سات جنوری کو شروع ہونے والی کنزیومر الیکٹرانکس کی سب سے بڑی نمائش میں ٹی آر ڈبلیو گرپ کمپنی کی جانب سے میڈیا کیلئے سیشن میں ایپل اور دیگر ٹیبلٹس کیلئے ائیر ماؤس اور الٹا ٹائپ کرنے والا کی بورڈ پیش کیا جارہا ہے۔ اس کے ذریعے ٹیبلٹ کیلئے باآسانی ٹائپنگ کی جاسکتی ہے ۔

اس نمائش میں رکھے یہ بلیو ٹوتھ روبوٹ آئی فون کے ساتھ چلتے ہیں اور ان کی آنکھوں میں انفراریڈ گن لگی ہیں۔ فون کو ہلانے جھلانے سے بھی یہ حرکت کرتے ہیں۔

کم ازکم آئی فون چارجر کا مسئلہ تو ختم ہوا۔ لاس ویگاس کی نمائش میں رکھا یہ ایک آئی فون کیس ہے جس میں چارجر موجود ہے اور یہ براہِ راست مین لائن میں نصب ہوکر موبائل چارج کرتا ہے۔ اس کیس کی تعارفی قیمت ساٹھ سے ستر ڈالر کے درمیان ہے۔

لیجئے، سر پر باندھنے کی پٹی ، بینڈانا میں اب فون پر بات کرنے کیلئے ہیڈفونز بھی لگا دئیے گئے ہیں۔ یہ ایجاد اکوسٹک شیپ نامی کمپنی کی ہے اور اسے رن فونز کا نام دیا گیا ہے۔ تاہم اس میں سے ہیڈفونز لگائے اور نکالے بھی جاسکتے ہیں۔

یہ روبوٹ بہت تیزی سے گیلے فرش صاف کرتا ہے اور ساتھ ہی فرش کا نقشہ بھی بناتا جاتا ہے۔ اسے لاس ویگاس میں ہونے والی ایک الیکٹرانکس نمائش میں رکھا گیا ہے۔

ویڈیو گیمز کیلئے میگنیٹومیٹر، جائروسکوپس اور دیگر 17 سینسر سے لیس ایک وی آر لباس پہن کر ویڈیو گیمز کھیلا جارہا ہے ۔ اس کے ذریعے گیمنگ کے تمام کیرکٹرز مجازی طور پر کسی اوتار کی طرح کنٹرول کئے جاسکتے ہیں۔

انٹرنیٹ سے جڑنے والا دنیا کا پہلا ٹوتھ برش جو یہ نوٹ کرتا ہے کہ دانت کتنے صاف ہوئے ہیں۔ یہ برش ریکارڈ بھی رکھتا ہے کہ کس دن دانت صاف کرنے میں کتنا وقت لگے گا۔

اسمارٹ چارج نامی کمپنی کے مالک ایل ای ڈی پر مشتمل ایک بلب دکھارہے ہیں جو ایک دفعہ چارج پر چار گھنٹے روشنی دیتا ہے۔ پاکستان کیلئے یہ انوکھا تحفہ ہوگا۔ اس کی قیمت پچیس ڈالر ہے۔

لاس ویگاس میں دنیا میں عام استعمال کی الیکٹرانک اشیا کی سب سے بڑی نمائش میں ایک تقریباً 1200 ڈالر مالیت کا ایک ڈرون نظر آرہا ہے جس پر وڈیو اور تصاویر کیلئے کیمرہ نصب ہے۔ پرواز کے دوران اس کی وڈیو آئی فون پر دیکھی اور ریکارڈ کی جاسکتی ہے۔

< Previous عظیم آتش فشاں کے پھٹنے کا راز افشا NEXT > فیس بک پر فرضی لائیک کا اُبھرتا ہوا کاروبار