دنیا کی دوسری مہنگی ترین شادی

شادی کا موقع ہر انسان کی زندگی میں بہت زیادہ اہمیت کا حامل ہوتا ہے اور ہر کسی کی خواہش ہوتی ہے کہ ان لمحات کو خوب یادگار بنایا جائے ۔ لیکن آج ہم ایک ایسی شادی کا ذکر کرنے جارہے جس نے شاہی خاندانوں میں ہونے والی شادیوں کی یادیں تازہ کردیں-

دنیا کے امیر ترین افراد کی فہرست میں شامل اور اسٹیل ٹائیکون کے نام سے پہچانے جانے والے بھارتی ارب پتی بزنس مین لکشمی متل نے اپنی بھتیجی شرمتی متل کی شادی پر 500 کروڑ یعنی پانچ ارب روپے خرچ کر ڈالے جو کہ 50 ملین پاؤنڈ بنتے ہیں-
 

اس شادی کو دنیا کی دوسری مہنگی ترین شادی قرار دیا جارہا ہے-

اس تین روزہ شادی کی تقریبات کا آغاز 5 دسمبر سے اسپین کے شہر بارسلونا میں ہوا اور ان تقریبات کے ہر لمحے یادگار بنا دیا گیا-

26 سالہ شیری متل اور 36 سالہ دولہا گل راج بہل کی شادی کا اہتمام بارسلونا کے میوزیم میں کیا گیا اور اس دوران میوزیم کو عوام کے لیے بند کر دیا گیا-

شادی کی تقریبات میں شرکت کے لیے 500 مہمانوں کو دعوت نامے بھیجے گئے اور ان انہیں ٹھہرانے کے انتظامات بارسلونا کے فائیو اسٹار ہوٹلوں میں کیے گئے-

شرکت کے لیے آنے والے مہمانوں کے استقبال کے لیے تھائی لینڈ اور بھارت سے 200 نوکروں کی فوج منگوائی گئی اور ان میں معروف شیف کو بھی شامل کیا گیا-