مٹی سے بنی دنیا کی سب سے بڑی مسجد

مسجد کو مسلمانوں کے معاشرے میں مرکزی حیثیت حاصل ہے۔ مسلمان جہاں کہیں بھی گئے یا آباد ہوئے، انہوں نے اُس علاقے میں مسجد ضرور تعمیر کی، کیوں کہ کسی بھی مسلم معاشرے کا تصور مسجد کے بغیر کیا ہی نہیں جاسکتا۔ جہاں جہاں بھی مسلمانوں نے مساجد تعمیر کیں وہاں ایک تعمیراتی کلچر بھی پیدا ہوا جس میں معاشرے اور زمانے کے ساتھ ساتھ موسم اور آب و ہوا کا بھی خیال رکھا گیا۔

مسلمانوں نے جہاں دیگر شعبوں میں اپنی انفرادیت قائم کی ہے وہاں طرز تعمیر میں جدت کے ساتھ اسلامی فکر و فلسفہ کا خیال رکھا ہے۔ مسجد کی تعمیر میں تو خاص طور پر اس بات کا خیال رکھا گیا کہ اسلام کی تہذیب اور تمدن کی مکمل عکاسی کی جائے۔ عرب سے اسلام پھیلانا شروع ہوا تو اس نے ابتدائی دور میں افریقہ کا رخ کیا حبشہ جو آج کل ایتھوپیا کے نام سے جانا جاتا ہے کہ راستے مصر، تیونس، الجزائر، مراکش اور افریقہ کے دیگر ممالک میں پہنچا۔
 

ان علاقوں میں اسلام اور مسلمانوں کے پہنچنے کے بعد مساجد کی تعمیر کا بھی آغاز ہوا، افریقہ کے ملک مالی میں اسلام پہنچا تو اس علاقے میں تعلیم اور اسلامی تہذیب کو فروغ حاصل ہوا۔ 800 عیسوی میں مالی کے شہر جینے کو اسلامی علوم کے مرکز کی حیثیت حاصل ہوگئی، جینے افریقہ کے قدیم شہروں میں شامل ہے جہاں جابجا اسلامی تہذیب و تمدن کے خوب صورت آثار آج بھی دیکھے جاسکتے ہیں مگر جینے کے مرکز میں مارکیٹ چوک پر بنی قدیم مسجد کو تمام آثار پر فوقیت حاصل ہے-

سوڈانی ساحلی طرز تعمیر (Sudano Sahelian) کا یہ شاہکار 1907 میں تیار ہوا جبکہ اس مقام پر 13 ہویں صدی میں ایک بہت بڑی مسجد عمر موجود تھی، لیکن 19 ویں صدی میں مرمت نہ ہونے کی وجہ سے اس کے مینار گر گئے اور عمارت بوسیدہ ہوگئی اور ہزاروں چھوٹے پرندوں نے اسے اپنا مسکن بنالیا۔

1893 میں جب فرانسیسیوں نے اسی علاقے کو فتح کیا تو اس مقام پر موجود عمارت کو منہدم کر کے اسکول بنا دیا بعدازاں مسجد کو ازسر نو تعمیر کیا گیا۔ جامع مسجد جینے کی تعمیر میں دھوپ میں سکھائی گئی اینٹوں کو استعمال کیا گیا ہے اور گارے کا لیپ کیا گیا ہے۔

دیواروں کی تعمیر میں 16 اور 24 انچ چوڑائی کے بلاک استعمال کیے گئے ہیں۔ تعمیر میں کجھور اور تاڑ کا استعمال بھی کیا گیا ہے تاڑ کے درخت کی موٹی اور مضبوط لکڑی کے شہتیر دیواروں اور چھتوں میں استعمال کیے گئے ہیں، تاکہ ٹوٹ پھوٹ کے امکانات کم کیے جاسکیں ساتھ ہی موسم کی سختی سے بھی بچا جاسکے اس مقصد کے لیے مچان بھی بنائے گئے ہیں۔