پاکستان میں ریڑھ کی ہڈی کی پہلی علاج گاہ

پاکستانی شہر لاہور کے علاقے جلو موڑ میں واقع ایک غیر سرکاری فلاحی ہسپتال گھرکی ٹرسٹ ٹیچنگ ہسپتال میں ریڑھ کی ہڈی کے امراض کی پہلی باقاعدہ علاج گاہ کا قیام عمل میں لایا جا رہا ہے جو اپنی مدد آپ کی بنیاد پر کام کرے گی۔

ڈوئچے ویلے کی رپورٹ کے مطابق ایک سو چودہ بستروں اور پانچ آپریشن تھیٹرز پر مشتمل ملک کے پہلے سپائن سنٹر کا با ضابطہ افتتاح اگلے مہینے ہوگا۔ چالیس کروڑ روپے کی لاگت سے تعمیر ہونے والے اس سپائن سنٹر پر پچھلے دو سالوں میں خرچ ہونے والے تیس کروڑ روپوں میں سے صرف ڈھائی کروڑ روپے پنجاب حکومت نے فراہم کیے ہیں، باقی تمام رقم عام لوگوں اور مخیر حضرات کے عطیات سے حاصل کی گئی ہے، ایک کروڑ روپے سے زائد ماہانہ خرچ والے اس سنٹر کے اخراجات کو پورا کرنے کے لیے اپنی مدد آپ کے تحت ایک ارب روپے کا انڈولمنٹ فنڈ بھی قائم کیا جا رہا ہے تاکہ اس سینٹر کو کسی محتاجی کے بغیر آزادانہ طور پر چلایا جا سکے،۔
 

اس سے پہلے گھرکی ہسپتال کے آرتھوپیڈک کے شعبے میں محدود پیمانے پر ریڑھ کی ہڈی کے مریضوں کے علاج کی سہولت میسر تھی، اس سپائن سنٹر کے شروع ہونے سے غریب لوگوں کی بڑی تعداد کو مفت علاج کی سہولت میسر آ سکے گی، گھرکی ہسپتال میں ڈائریکٹر آف سپائن اینڈ آرتھوپیڈک سرجری پروفیسر ڈاکٹر عامر عزیز نے بتایا کہ پاکستان میں ریڑھ کی ہڈی کے امراض عام ہیں ، ٹی بی ، حادثات، جرائم اور دہشت گردانہ واقعات اور دیگر وجوہات کی بنا پر ہر سال چالیس سے پچاس ہزار مریض ریڑھ کی ہڈی سے متعلقہ مسائل کے ساتھ ہسپتالوں میں لائے جاتے ہیں، یاد رہے پاکستان میں تیس لاکھ سے زائد ٹی بی کے مریض ہیں، اور ہر سال ان میں ایک لاکھ نئے مریضوں کا اضافہ ہو رہا ہے،ٹی بی کے شکار مریضوں کی بھی ریڑھ کی ہڈی کی سرجری درکار ہوتی ہے، اس سے پہلے ریڑھ کی ہڈی کے مریضوں کے علاج کے لیے گھرکی ہسپتال میں بلا معاوضہ کام کرنے والے ڈاکٹروں نے ایک چھوٹا سا سپائن یونٹ قائم کر رکھا تھا، ٹوٹی ہڈیوں کو جوڑنے، کبڑے پن کو درست کرنے، کمر کی رسولیاں نکالنے، اور مہروں سے کینسر کے اثرات نکالنے سمیت بہت سے طبی خدمات فراہم کی جا رہی ہیں،۔

سوئزرلینڈ میں قائم سپائن سرجنوں کی سب سے بڑی ایسوسی ایشن اے او سپائن انٹرنیشنل نے پاکستان سپائن سنٹر کی کارکردگی کو سراہتے ہوئے ڈاکٹر عامر عزیز کو اپنی بین الاقوامی فیکلٹی میں شامل کر رکھا ہے، اس وجہ سے لاہور کے سپائن سنٹر میں آئرلینڈ، فلپائن اور نیپال سمیت مختلف ملکوں کے سپائن سرجن تربیت حاصل کرنے آتے ہیں، سعودی عرب،عراق، کویت اور بنگلہ دیش سمیت کئی ملکوں کے اسی سے زائد سرجنز اس سنٹر سے تربیت کے حصول کے لیے ویٹنگ لسٹ میں موجود ہیں، یہ سنٹر اب تک بیس پاکستانی سرجنوں کو سپائن سرجری کی تربیت دے چکا ہے،۔