انوکھا بازار جہاں خرید و فروخت اشاروں میں کی جاتی ہے

آپ کو یہ جان کر حیرت ہوگی کہ واشنگٹن ڈی سی میں ایک ایسا بازار ہے جہاں پر خرید و فروخت کے لیے اشاروں کی زبان استعمال کی جاتی ہے۔ جی ہاں، ’یونین مارکیٹ‘ نامی اس بازار میں دکانداروں سے لے کر خریداروں کی اکثریت ان لوگوں کی ہے جو سماعت یا گویائی سے متعلق کسی مسئلے کا شکار ہیں۔

وائس آف امریکہ کی رپورٹ کے مطابق یہ بازار ایسے ہی افراد کے لیے ایک خاص مقام بن گیا ہے۔ ایک ایسی جگہ جہاں لوگ آتے ہیں، خریداری کرتے ہیں اور کھانے پینے سے بھی لطف اندوز ہوتے ہیں۔
 

قوت ِ سماعت یا گویائی سے محروم افراد کو یہاں پر کسی پریشانی یا دقت کا سامنا نہیں ہوتا کیونکہ یہاں پر موجود دکاندار بھی انہی کی زبان میں بات کرتے دکھائی دیتے ہیں۔ انہی میں سے ایک دکاندار ہیں تھیوڈس سگز، جو اس بازار میں ایک ٹھیلا لگاتے ہیں۔

تھیڈیوس سگز نے جو خود بھی قوت ِ سماعت سے محروم ہیں، اس تاریخی مارکیٹ میں گذشتہ برس ستمبر سے کام کرنا شروع کیا تھا۔

اس بازار میں کام شروع کرنے کے بعد سے 23 سالہ تھیڈیوس سگز اپنی یونیورسٹی سے رخصت پر ہیں۔ انکی یونیورسٹی گلاڈٹ یونیورسٹی دنیا کی وہ واحد یونیورسٹی ہے جہاں کمزور قوت ِ سماعت اور قوت ِ گویائی والے افراد کو باقاعدہ تعلیم مہیا کی جاتی ہے۔

تھیڈیوس سگز کا کہنا ہے کہ، ’اس مارکیٹ کی ایک اچھی بات یہ ہے کہ یہ مارکیٹ میری یونیورسٹی سے قریب ہے جو قوت ِ گویائی اور سماعت سے محروم افراد کے لیے کسی سرمایے سے کم نہیں۔ اسی وجہ سے ہم یہاں اس مارکیٹ میں نہ صرف عام کمیونٹی بلکہ بطور ِ خاص قوت ِ گویائی و سماعت سے محروم افراد کے کام بھی آ رہے ہیں‘۔