ندی تیر کر سکول جانے والا استاد٬ نہ تاخیر نہ چھٹی

عبدالملک گذشتہ بیس سال سے روزانہ ندی تیر كر پار کرتے ہیں اور دوسرے گاؤں کے سکول میں پڑھانے جاتے ہیں۔

بی بی سی کی رپورٹ کے مطابق بھارت کی جنوبی ریاست کیرالا کے ایک چھوٹے سے گاؤں میں رہنے والے ریاضی کے استاد عبد الملک نے 20 سال میں کبھی سکول پہنچنے میں تاخیر نہیں کی اور نہ ہی کبھی کوئی چھٹی لی ہے۔

آج بھی وہ سر پر بیگ رکھ ربر کے ٹائر کے سہارے تیركر بچوں کو پڑھانے سکول جاتے ہیں۔
 

اپنے گاؤں کے بارے میں عبدالملک بتاتے ہیں: ’یہ ایک چھوٹا سا گاؤں ہے۔ چھوٹا گاؤں ہونے کے باوجود یہ بہت ہی خاص ہے۔ بہت سے تعلیم یافتہ لوگوں کا یہاں ہونا ہی اس کی خصوصیت ہے۔ دور افتادہ دیہی علاقہ ہونے کے باوجود یہاں بہت سے اساتذہ رہتے ہیں۔ یہاں کئی نسلوں سے درس و تدریس کی روایت قائم ہے۔‘

عبدالملک کہتے ہیں: ’میرے خیال میں استاد بننے سے ہمیں اچھا شہری بننے میں مدد ملتی ہے۔ میں بچپن سے ہی استاد بننا چاہتا تھا۔ تعلیم ہمیں بچوں کے لیے مثالی بننے میں مدد کرتی ہے۔‘

ملک کہتے ہیں کہ ’سکول میرے گاؤں سے گزرنے والی کادالندی ندی کے دوسرے کنارے پر آباد ایک گاؤں میں ہے۔ سڑک کے ذریعے سکول کا فاصلہ سات کلومیٹر ہے جبکہ ندی عبور کر کے جانے میں یہ فاصلہ صرف ایک کلومیٹر رہ جاتا ہے۔ اس گاؤں میں نہ تو کوئی استاد ہے اور نہ ہی کوئی ڈاکٹر۔ یہ گاؤں تین طرف سے ندی سے گھرا ہوا ہے۔‘

بیس سال قبل کام شروع کرتے وقت عبد الملک سکول کیسے جاتے تھے؟ وہ بتاتے ہیں: ’ان کے راستے میں کوئی بھی پل نہیں ہے۔ بس سے سکول تک سات کلومیٹر کے راستے میں صرف ایک پل ہے اور وہ ابھی حال ہی میں بنا ہے۔ جب میں پہلی بار سکول پڑھانے گیا تھا تو میں نے بس لی تھی اور 12 کلومیٹر کے بعد ایک پل پڑتا تھا۔ پہلے مجھے تین تین بسیں بدل کر جانا پڑتا تھا۔‘

وہ کہتے ہیں کہ انہیں گھر سے جلدی نکلتا ہوتا تھا تاکہ سکول کے لیے تاخیر نہ ہو: ’سوا دس بجے تک اسکول پہنچنے کے لیے مجھے تقریباً ساڑھے آٹھ بجے گھر سے نکلنا پڑتا تھا۔ اس طرح اپنے گاؤں سے ندی کے دوسرے کنارے پر آباد گاؤں تک پہنچنے میں دو گھنٹے لگ جاتے تھے۔ سب سے زیادہ وقت تو بس کا انتظار کرنے میں ضائع ہو جاتا تھا۔‘

’ایک ساتھی ٹیچر نے مجھے تیر كر سکول آنے کی تحریک دی۔ انہوں نے مجھے بتایا کہ تیر كر سکول آنا میرے لیے آسان ہوگا۔ پھر میں نے تیرنا سیکھا اور اس کے بعد میں تیر كر سکول جانے لگا۔‘