زیادہ تر حکومتی وعدے جھوٹ نکلے

پاکستان میں اُبھرتے ہوئے کھلاڑیوں کی کامیابیاں ان کے حالات زندگی تبدیل کرنے میں کم ہی مدد گار ثابت ہوتی ہیں۔ پاکستان کے موجودہ اسنوکر چیمپئن محمد آصف کی حالت دیکھ کر یہ فقرہ بالکل سچ لگتا ہے۔

ڈوئچے ویلے کے مطابق اکتیس سالہ محمد آصف ایک برس پہلے جب امیچور اسنوکر چیمپئین شپ جیت کر واپس پہنچے تھے تو نہ صرف مقامی میڈیا بلکہ سیاستدانوں نے بھی بڑھ چڑھ کر اس کا کسی ہیرو جیسا استقبال کیا تھا۔ حکومتی وزیروں سمیت متعدد افراد نے ان کی مالی امداد اور بڑے بڑے انعامات دینے کا وعدہ کیا تھا لیکن ایک برس گزرنے کے بعد آج بھی وہ صنعتی شہر فیصل آباد کے ایک معمولی سے گھر میں رہتے ہیں اور آج بھی ایک بیسمینٹ میں واقع ایک بوسیدہ سے اسنوکر کلب میں پریکٹس کرتے ہیں۔
 

حکومتی امدادی وعدوں کے بارے میں ڈی ڈبلیو سے خصوصی گفتگو کرتے ہوئے آصف کا کہنا تھا، ’’حکومت کی طرف سے کیے جانے والے زیادہ تر وعدے پورے نہیں ہوئے۔ میاں شہباز شریف نے دس لاکھ بطور انعام دینے کا وعدہ کیا تھا۔ شرجیل میمن صاحب نے دس لاکھ دینے کا وعدہ کیا تھا، اسی طرح کا وعدہ وزیر اعلیٰ سندھ نے کیا تھا۔ خیبر پختونخوا کے وزیر کھیل عاقل شاہ صاحب نے دس لاکھ دینے کا وعدہ کیا تھا، ان میں سے کسی ایک نے بھی اپنا وعدہ پورا نہیں کیا۔ حکومتی پالیسی کے تحت کوئی چیمپئین شپ جیتنے والے کھلاڑی کو ایک کروڑ روپے دیے جانا چاہیے۔ مجھے وہ رقم بھی نہیں دی گئی حالانکہ میں حال ہی میں مزید دو چیمئین شپس جیت چکا ہوں۔‘‘

محمد آصف کا کہنا تھا کہ راجہ پرویز اشرف کی طرف سے پندرہ لاکھ دینے کا وعدہ کیا گیا تھا اور وہ انہوں نے پورا بھی کیا ہے۔

محمد آصف اس کامیابی کی وجہ سے وہ اپنے شہر ایک سُپر اسٹار کے طور پر جانے جاتے ہیں۔ محمد آصف کا کہنا تھا، ’’خدا کا شکر ہے، میں جہاں کہیں بھی جاتا ہوں لوگ مجھے خاص محبت دیتے ہیں۔ ہر کوئی میرا خیال رکھتا ہے اور میرے لیے دعا کرتا ہے۔اب ہر کوئی مجھے جانتا ہے اور یہی میرے لیے باعث فخر بات ہے۔‘‘