دنیا کا گیلا ترین مقام

آج تک آپ دنیا کے بلند ترین٬ گرم ترین٬ سرد ترین یا پھر دوسری منفرد خصوصیات کے حامل مقامات کے بارے میں پڑھتے یا سنتے آئے ہیں٬ لیکن آج ہم کو آپ کو بتائیں گے دنیا کے گیلے ترین مقام کے بارے میں-

ہندوستان کے دور دراز گاؤں موسن رام کا نام دنیا بھر میں سب سے زیادہ بارشوں والے علاقے کی حیثیت گنیز بک آف ورلڈ ریکارڈ میں درج کر لیا گیا ہے- اور دلچسپ بات یہ ہے کہ یہاں کے مکین اس حقیقت سے بے خبر ہیں۔

بےخبری کا اندازہ اس بات سے لگائیے کہ گاؤں کی مکین بینی کائتر کی سو سالہ پر دادی نے اے ایف پی سے گفتگو کے دوران حیران کن انداز میں دریافت کیا ‘واقعی، کیا یہ دنیا کی گیلی ترین جگہ ہے؟، میں نہیں جانتی۔
 

ہندوستانی ریاست میگھالیا کا یہ گاؤں کسی اور ہی دنیا کا منظر پیش کرتا ہے جہاں لوگ گھن گرج کے ساتھ ہونے والی بارش کے دوران اپنے گھروں کو گھاس پھوس سے ڈھانک کر اس کی خوفناک آواز سے بچنے کی کوشش کرتے ہیں- اس علاقے کا رخ کرنے والا ایک عام آدمی اس وقت حیرت زدہ رہ جاتا ہے جب وہ زنگ آلود سائن بورڈ پر’دنیا کی گیلی ترین جگہ’ کی تحریر پڑھتا ہے۔

ریاست میگھالایا کے موسن رام نامی اس گاؤں میں سالانہ اوسطاً 11 ہزار 873 ملی میٹر یا 467 انچ بارش ہوتی ہے جس کے باعث دنیا بھر میں سب سے زیادہ بارش والے علاقے کے طور پر اس کا نام گنیز بک آف ورلڈ ریکارڈ میں شامل کر لیا گیا۔

ماہرین موسمیات کا کہنا ہے کہ موسن رام بنگلہ دیش اور خلیج بنگال سے قریب واقع ہے جس کے باعث یہاں شدید بارشیں ہوتی ہیں۔

ہندوستانی محکمہ موسمیات کے سنیت دت نے اے ایف پی کو بتایا کہ ہوتا یہ ہے کہ جب کبھی بھی خلیج بنگال میں نمی جمع ہوتی ہے تو اس کے باعث موسن رام پر قطرے جمع ہو جاتے ہیں جس کے باعث ایک لمبے عرصے تک شدید بارشوں اور مون سون کا موسم رہتا ہے۔

گزشتہ ہفتے ملکی دارالحکومت میں شدید بارش کے باعث سڑکیں جا بجا ندی نالوں کا منظر پیش کر رہی تھیں اور ایئرپورٹ پر بھی سیلاب کا سا منظر تھا لیکن موسن رام کے لوگوں کیلیے یہ چیزیں معمولی مسائل ہیں۔

اب سے قریباً 30 سال پہلے یہاں نہ ہی ہموار سڑکیں تھیں، نہ بجلی اور نہ ہی فراہمی آب کا نظام اور اس دوران چھ مہینے تک جاری رہنے والے مون سون سیزن کے باعث یہاں کے رہائشیوں کو شدید مشکلات اور اذیت سے دوچار ہونا پڑا تھا۔