کشش ثقل سے چلنے والا پہلا بلب

اسے چارج ہونے میں صرف تین سیکنڈ لگتے ہیں اور یہ 25 منٹ تک روشنی دے سکتی ہے۔ بیٹری کے بغیر یہ لائٹ صرف مٹی یا وزنی شے اور کششِ ثقل سے بجلی بناتی ہے اور اس کی قیمت صرف پانچ ڈالر تک ہوسکتی ہے۔

ڈان نیوز کی رپورٹ کے مطابق مارٹن رڈی فورڈ اور جم ریوز نامی دو برطانوی موجدوں کی اس کوشش کو ‘ ثقل روشنی’ یا ‘ گریوٹی لائٹ’ کا نام دیا گیا ہے۔ دونوں ماہرین نے اس ایجاد کو ڈرائنگ بورڈ کے تخیل سے پہلے نمونے ( پروٹوٹائپ) تک منتقل کرنے کیلئے چار سال تک انتھک محنت کی ہے۔
 

انناس جیس شکل کی یہ ایل ای ڈی لائٹ اور اس کا پورا نظام ایک وزنی بیگ کی مدد سے چارج ہوتا ہے۔ اس مضبوط بیگ میں مٹی، پتھر ڈالے جاتے ہیں جن کا وزن نو یا دس کلوگرام تک ہوتا ہے ۔ یہ وزن ایک تار سے جڑ کر پورے نظام سے منسلک رہتا ہے۔

پہلے بیگ (وزن) کو چھ فٹ تک بلند کرتے ہیں تو چھوڑے جانے پر وزن کسی چرخی پر رسی کی طرح پھسلتا ہے لیکن بہت آہستگی سے۔

تار دھیرے دھیرے کھسکھتے ہوئے اندر موجود چرخیوں اور گراریوں کو گھماتا ہے۔ اس میں نصب ایک موٹر ہزاروں چکر لیتی ہے اور اس سے بجلی بنتی ہے اور ایل ای ڈی روشن ہوجاتی ہے۔ گریویٹی لائٹ اس وقت تک روشنی دیتی رہتی ہے جب تک 25 منٹ کے بعد وہ بالکل نیچے کی جانب نہیں پہنچ جاتا ۔

اس طرح تین سیکنڈ میں چارج کے بعد یہ تقریباً 25 منٹ تک روشنی بکھیرتی رہتی ہے جو مٹی کے تیل سے جلنے والے لیمپ یا لالٹین کی روشنی س کچھ زیادہ ہوتی ہے۔

تاہم روشنی کی شدت کو کم یا زیادہ بھی کیا جاسکتا ہے اور اسی طرح اوسط سے کم وقت کیلئے زیادہ روشنی بھی حاصل کی جاسکتی ہے۔

ثقل روشنی کے نظام پر سامنے کی جانب دو ٹرمینلز بھی موجود ہیں جو ریڈیو اور بیٹریوں وغیرہ میں بجلی بھرنے کیلئے استعمال کئے جاسکتے ہیں۔

سائنس اینڈ ڈویلپمنٹ نیٹ ورک کی ویب سائٹ کے مطابق اس سال کے آخر میں اس کے کئی نمونے ترقی پذیر ممالک میں فیلڈ ٹیسٹنگ کے لئے بھجوائے جائیں گے۔ جہاں تمام حالات اورماحول میں ان کی آزمائش کی جائے گی اور انہیں لگاتار کئی کئی دنوں تک چلایا جائے گا۔

اگر سب ٹھیک رہا تو یہ ایجاد ان علاقوں کے افراد کیلئے امید کی کرن ثابت ہوگی جو گرڈ بجلی سے دور رہتے ہیں خصوصاً ترقی پذیر ممالک میں۔ ثقل روشنی سورج غروب ہونے کے بعد ان لوگوں کی زندگی میں کئی گھنٹوں تک ماحول دوست اجالے پھیلاسکتی ہے۔ اسی طرح شام کا اندھیرا پھیلنے کے بعد بھی بچوں کو کھیلنے اور پڑھنے کے مواقع میسر آسکتے ہیں۔