کمپیوٹر نجومی بھی بن جائیں گے

مستقبل کے بارے میں جاننا ہمیشہ سے ہی انسان کی کمزوری رہی ہے۔ شائد یہ بات انسان کی جبلت میں شامل ہے کہ وہ آنے والے وقت کے بارے میں جان سکے۔ مستقبل میں جھانکنے کی خواہش کے باعث زمانہ قدیم میں نجومیوں اور کاہنوں کی آﺅ بھگت کی جاتی رہی ہے۔ جدید سائنسی دور میں اس حوالے سے کافی تحقیقات کی جاتی رہی ہیں، جبکہ ہالی ووڈ میں اس حوالے سے ٹائم مشین، ٹائم کوپ ، بیک ٹو دی فیوچر جیسی فلمیں تخلیق کی گئیں ہیں۔

اب گوگل اور مائیکروسوفٹ نے ایک ایسا سوفٹ ویئر تیار کرنے کا دعویٰ کیا ہے جو کہ آپ کو اپنے مستقبل کے بارے میں بتا سکتا ہے ۔یہ سافٹ ویئر تجربات کے لئے تیاری کے آخری مرحلے میں ہے اور اس کے ذریعے انسان اپنے مستقبل کے بارے میں آسانی کے ساتھ جان سکیں گے جس کا مطلب یہ ہے کہ یہ سافٹ ویئر انسان کے مستقبل کا حال بتانے والا کوئی نجومی بن جائے گا۔ چنانچہ لوگوں کو کسی جگہ پر انٹرویو دینے کے لئے جانے پر اس سوال کا جواب دینے میں آسانی ہوگی کہ وہ خود کو مستقبل میں کہا دیکھنا پسند کریں گے۔
 

مائیکرو سافٹ اور گوگل کے محققین نے نیا کمپیوٹر سافٹ ویئر ”فار آﺅٹ“ تخلیق کیا ہے جو انسانوں کو ان کے مستقبل کے بارے میں بتا سکے گا۔ فار آﺅٹ پروگرام لوگوں کے بارے میں بھی بتا سکے گا کہ وہ مستقبل میں کس جگہ پر یا کون سے ملک میں ہوں گے۔

اس پروگرام کو بنانے والے ماہرین کا کہنا ہے کہ فار آﺅٹ سافٹ ویئر کمپیوٹر کے ذریعے یہ پیشگوئی بھی کر سکے گا کہ آپ مستقبل میں اپنی جاب تبدیل کردیں گے۔ یہ بھی معلوم کیا جا سکے گا کہ اس کی شادی شدہ زندگی کیسی رہے گی۔ اس کے علاوہ سافٹ ویئر یہ تک بتا دے گا کہ آپ مستقبل میں مکان تبدیل کرنے والے ہیں۔

بتایا گیا ہے کہ یہ پروگرام پہلے لوگوں کا جی پی ایس ڈیوائس کے ذریعے پتہ چلائے گا اور پھر ان کی روزمرہ زندگی کے معمولات کے بارے میں معلومات حاصل کرے گا۔ اس کے بعد وہ لوگوں کے مستقبل کے بارے میں پیشگوئی کرے گا۔