’’حضرت ابوہریرہ رضی اللہ عنہ سے
مروی ہے کہ حضور نبی اکرم صلی اللہ علیہ وآلہ وسلم نے فرمایا : دنیا مومن
کے لئے قید خانہ اور کافر کے لئے جنت ہے۔
:: مسلم شریف کتاب الزهد والرقائق، 4 / 2272، الرقم : 2956،
’’حضرت انس رضی اللہ عنہ سے روایت ہے کہ حضور نبی اکرم صلی اللہ علیہ وآلہ
وسلم فرمایا کرتے تھے : قیامت کے روز کافر کو پیش کیا جائے گا تو اس سے کہا
جائے گا کہ اگر تیرے پاس اتنا سونا ہو کہ اس سے زمین بھر جائے تو کیا تم
اسے اپنی رہائی کے بدلے میں فدیہ دینے کو تیار ہو جاتے؟ وہ کہے گا : ہاں!
تو اس سے کہا جائے گا کہ تجھ سے اس کی نسبت بہت ہی آسان چیز مانگی گئی تھی
(اور تو نے انکار کر دیا تھا)
:: بخاری شریف کتاب : الرقاق، 5 / 2395، الرقم : 6173،
’’حضرت انس بن مالک رضی اللہ عنہ روایت کرتے ہیں کہ حضور نبی اکرم صلی اللہ
علیہ وآلہ وسلم نے فرمایا : بیشک اللہ تعالیٰ نیکی کے حوالے سے مومن پر ظلم
نہیں فرماتا۔ دنیا میں بھی اس (مومن) کو اس (نیکی ) کا اجر دیا جاتا ہے اور
آخرت میں بھی اس کا اجر دیا جاتا ہے۔ رہا کافر تو اس نے دنیا میں جو اللہ
تعالیٰ کے لئے نیکیاں کی ہیں ان کا اجر اسے دنیا میں ہی دے دیا جائے گا اور
جب وہ آخرت میں پہنچے گا تو اس کے پاس کوئی نیکی نہیں ہو گی جس کی اسے جزا
دی جائے۔
:: مسلم شریف کتاب صفة القيامة والجنة والنار،4 / 2162، الرقم : 2808
’’حضرت عبد اﷲ بن مسعود رضی اللہ عنہ روایت کرتے ہیں کہ حضور نبی اکرم صلی
اللہ علیہ وآلہ وسلم نے فرمایا : مسلمان کو گالی دینا فسق ہے اور اس کے
ساتھ قتال کرنا کفر ہے۔‘‘
:: بخاری شریف کتاب الإيمان،1 / 27، الرقم : 48
’’حضرت ابوہریرہ رضی اللہ عنہ سے مروی ہے کہ حضورنبی اکرم صلی اللہ علیہ
وآلہ وسلم کے ہاں ایک کافر مہمان ہوا۔ آپ صلی اللہ علیہ وآلہ وسلم نے اس کے
لئے ایک بکری کا دودھ دوہنے کا حکم دیا وہ دوہی گئی تو وہ تمام دودھ پی
گیا، دوسری بکری کا حکم دیا وہ دوہی گئی تو اسے بھی پی گیا۔ پھر ایک اور
دوہی گئی تو اسے بھی پی گیا یہاں تک کہ سات بکریوں کا دودھ پی گیا۔ دوسری
صبح وہ اسلام لے آیا۔ حضور نبی اکرم صلی اللہ علیہ وآلہ وسلم نے اس کے لئے
بکری دوہنے کا حکم دیا تو اس نے دودھ پی لیا پھر دوسری بکری دوہنے کا حکم
فرمایا وہ دوہی گئی تو وہ اس کا سارا دودھ نہ پی سکا۔ رسول اﷲ صلی اللہ
علیہ وآلہ وسلم نے فرمایا : مومن ایک آنت میں پیتا ہے اور کافر سات آنتوں
سے پیتا ہے۔
:: مسلم شریف کتاب الأشربة،3 / 1632، الرقم : 2063
’’حضرت عبد اﷲ بن عمر رضی اﷲ عنہما روایت کرتے ہیں کہ رسول اللہ صلی اللہ
علیہ وآلہ وسلم نے فرمایا : جب کوئی شخص اپنے (مسلمان) بھائی کو کافر کہتا
ہے تو دونوں میں سے کوئی ایک شخص اس کفر کے ساتھ لوٹا (یعنی اگر جسے کہا
گیا وہ کافر نہ ہوا تو کہنے والا خود کافر ہو جائے گا)
:: بخاری شریف کتاب الأدب،5 / 2264، الرقم : 5753
’’حضرت عبداللہ بن عباس رضی اﷲ عنھما سے روایت ہے کہ حضور نبی اکرم صلی
اللہ علیہ وآلہ وسلم نے فرمایا : تم میرے بعد کفر کی طرف نہ لوٹ جانا کہ تم
میں سے بعض، بعض کی گردنیں اڑانے لگیں۔
:: بخاری شریف کتاب الفتن، 6 / 2594، الرقم : 6668
’’حضرت انس بن مالک رضی اللہ عنہ سے مروی ہے کہ حضور نبی اکرم صلی اللہ
علیہ وآلہ وسلم نے فرمایا : انصار سے محبت ایمان کی نشانی ہے، اور انصار سے
بغض منافقت کی علامت ہے۔
:: بخاری شریف کتاب : الإيمان، 1 / 14، الرقم : 17،
’’حضرت ام سلمہ رضی اﷲ عنہا سے روایت ہے کہ رسول اللہ صلی اللہ علیہ وآلہ
وسلم فرمایا کرتے تھے : کوئی منافق علی (رضی اللہ عنہ) سے محبت نہیں کرتا
اور کوئی مومن علی (رضی اللہ عنہ) سے بغض نہیں رکھتا۔
:: ترمذی شریف کتاب المناقب عن رسول اﷲ صلي الله عليه وآله وسلم، باب :
(21)، 5 / 635، الرقم : 3717
حضرت زِر بن حبیش رضی اللہ عنہ سے مروی ہے کہ حضرت علی رضی اللہ عنہ بیان
کرتے ہیں کہ حضور نبی اکرم صلی اللہ علیہ وآلہ وسلم نے مجھ سے عہد فرمایا :
(اے علی!) تجھ سے مومن ہی محبت رکھے گا اور تجھ سے منافق ہی بغض رکھے گا۔
:: ترمذی شریف کتاب المناقب عن رسول اﷲ صلي الله عليه وآله وسلم، باب :
(21)، 5 / 643، الرقم : 3736
’’حضرت زِرّ بن حبیش رضی اللہ عنہ روایت کرتے ہیں کہ حضرت علی رضی اللہ عنہ
نے فرمایا : قسم ہے اس ذات کی جس نے دانہ چیرا اور جس نے جانداروں کو پیدا
کیا! حضور نبی اکرم صلی اللہ علیہ وآلہ وسلم نے مجھ سے عہد فرمایا تھا کہ
مجھ سے صرف مومن محبت رکھے گا اور صرف منافق ہی مجھ سے بغض رکھے گا۔
:: سنن نسائی،۔کتاب الإيمان وشرائعه،8 / 115، الرقم : 5018
سنن ابن ماجة، 1 / 42، الرقم : 114، |