انڈیا: کھلاڑیوں نے انعام میں ملنے والی گائیں لوٹا دیں

 

انڈین ریاست ہریانا میں تین خواتین باکسروں نے گزشتہ مہینے ریاست کے زرعی وزیر اوم پرکاش دھنکھڑ سے انعام میں ملنے والی گائیں واپس کر دی ہیں۔
 


ریاست کی بی جے پی حکومت نے گزشتہ برس نومبر میں قومی چیمپئن شپ میں میڈل جیتنے والی خواتین باکسروں کو انعام میں ایک ایک گائے دی تھی۔ یہ گائیں ان کے خاندان کے لیے مصیبت بن گئیں ہیں۔

مشکل اتنی بڑھ گئی کہ تین خواتین باکسروں نے اپنی گائے ریاستی حکومت کو واپس کر دی ہے۔ تین کھلاڑیوں نیتو، جیوتی اور ششی کے بعد اب چوتھی کھلاڑی انوپما بھی اپنی گائے لوٹانے پر غور کر رہی ہے۔
 


انوپما نے بی بی سی کو فون پر بتایا کہ ان کی گائے ٹھیک سے دودھ نہیں دے رہی ہے۔ ان کے مطابق گائے کو گھر لانے کے بعد اس کے لیے دس ہزار کا چارا خریدا جا چکا ہے لیکن وہ آج تک صرف تین لیٹر دودھ ہی دیتی ہے۔ اس لیے وہ بھی اپنی گائے لوٹانا چاہتی ہیں۔

گزشتہ برس انیس سے چھبیس نومبر کے درمیان ریاست آسام کے شہر گوہاٹی میں ورلڈ یوتھ ویمین باکسنگ چیمپئن شپ ہوئی تھی۔ اس میں چھ باکسروں نے میڈل جیتے تھے۔

باکسر جیوتی گولیا نے بتایا کہ ’دودھ دینا تو چھوڑیے گائے نے میرے گھر کے افراد پر تین مرتبہ حملہ کر دیا۔‘
 


جیوتی نے بتایا کہ ’گائے کے حملے سے میری ماں زخمی ہو گئیں۔ اس کے بعد ہم نے گائے واپس کر دی۔ ہم بھینس کے ساتھ ہی ٹھیک ہیں۔‘

چیمپئن شپ میں جیتنے والی باکسروں کے اعزاز میں انتیس نومبر کو ایک پروگرام رکھا گیا تھا جس میں زرعی وزیر نے چھ باکسروں کو گائیں دینے کا اعلان کرتے ہوئے کہا تھا کہ ’گائے کے دودھ سے خوبصورتی بڑھنے کے ساتھ دماغ بھی تیز ہوتا ہے۔‘

ہریانا کی کھرانا ڈیری کے مالک راجیو کھرانا نے بتایا کہ ہریانا حکومت نے ان سے چھ گائیں خریدی تھیں جن میں ہر ایک گائے کی قیمت چالیس سے پچاس ہزار روپے کے درمیان ہے۔
 


ان کے مطابق ’ہم نے سبھی اچھی نسل کی گائیں بیچی ہیں ہمارے پاس سبھی اچھی طرح دودھ دے رہی تھیں۔ صرف ایک گائے کا بچہ مرنے کے بعد سے وہ دودھ نہیں دے رہی تھی۔ ہم نے تین گائیں واپس لے لی ہیں اور ان کھلاڑیوں سے کہا ہے کہ وہ خود ڈیری آئیں اور یہاں دودھ نکال کر دیکھ لیں اور اپنی پسند کی گائے لے جائیں۔‘

ہریانا کے زرعی وزیر اوم پرکاش دھنکھڑ نے کہا ہے کہ اگر کھلاڑیوں کو انعام میں ملی گائے پسند نہیں ہے تو وہ پوری ریاست میں کہیں اور سے اپنی پسند کی گائے خرید لیں۔ ان کا کہنا ہے کہ کھلاڑی اگر نئی گائے کا بل ان کے پاس بھیجیں تو اس کی ادائیگی کر دی جائے گی۔


Partner Content: BBC URDU

Email
Rate it:
Share Comments Post Comments
08 Jan, 2018 Total Views: 1709 Print Article Print
NEXT 
Reviews & Comments
Post your Comments Language:    
Type your Comments / Review in the space below.
The Haryana government had in November last year given a fresh twist to the debate over cows in the country when it had gifted the bovines to six women boxers who had won medals at a national championship. But the move seems to have backfired with three boxers, who won medals at the women's senior national boxing championship in Guwahati, returning the cows, saying they kick and don't give milk.
MORE ON ARTICLES
MORE ON HAMARIWEB