سوشل میڈیا وقت کی ضرورت: ہماری ویب رائٹرز کلب کی ورکشاپ

گزشتہ اتوار 31 دسمبر 2017 کو ہماری ویب رائٹرز کلب کے زیرِ اہتمام “ سوشل میڈیا وقت کی ضرورت“ کے عنوان سے ایک روزہ ورکشاپ کا انعقاد کیا گیا- یہ معلوماتی ورکشاپ کراچی کے علاقے گلشن اقبال میں واقع وی ٹرسٹ میں منعقد کی گئی- اس ورکشاپ میں ہماری ویب رائٹرز کلب اور کراچی کے معروف صحافیوں ، کالم نگاروں نے اپنے مقالات پیش کیے جبکہ اس ورکشاپ میں لوگوں کی ایک بڑی تعداد نے شرکت کی- ورکشاپ کا آغاز تلاوت کلام پاک سے کیا گیا اور اس کی میزبانی کے فرائض رائٹرز کلب کے سیکریٹری جنرل جانب عطا محمد تبسم صاحب نے انتہائی احسن طریقے سے انجام دیے۔
 

جناب عطا محمد تبسم صاحب نے ورکشاپ کے شرکاﺀ کی آمد کا شکریہ ادا کرتے ہوئے کلب کی سرگرمیوں پر اور ورکشاپ کے موضوع کی اہمیت پر روشنی ڈالی اور ساتھ ہی یہ بھی کہا کہ “آج ہماری ویب رائٹرز کلب کے زیرِ اہتمام ہونے والی ورکشاپ سال 2017 کا آخری پروگرام ہے“۔

ہماری ویب رائیٹرز کلب کے صدر پروفیسر ڈاکٹر رئیس صمدانی نے ورکشاپ میں خطبہ استقبالیہ پیش کرتے ہوئے تمام مہمانوں کو خوش آمدید کہا۔ ڈاکٹر رئیس احمد صمدانی کا کہنا تھا کہ “ سوشل میڈیا گھر گھر میں موجود ہے اور ہر گھر میں سوشل میڈیا کی اچھائیوں اور اس کے منفی اثرات پر گفتگو ہوتی ہے۔ سوشل میڈیا کی اہمیت اور ضرورت سے انکار نہیں کیا جا سکتا ، اس کی اس اہمیت نے ہماری ویب رائیٹرز کلب کو اپنے ورکشاپ کا موضوع بنانے کی ترغیب دی“۔
 

ورکشاپ کے موضوع پر اظہار خیال کرنے والے دیگر کالم نگاروں اور صحافی حضرات میں منیر بن بشیر، شیخ خالد زاہد، محمد ارشد قریشی، مسرت علی، عابد حسین، پروفیسر ڈاکٹر شبیر خورشید، اعظم عظیم اعظم، مزمل احمد فیروزی، انیس منصوری، منصوراحمد خان مانی، شاہانہ جاوید، سلیم فاروقی شامل تھے۔

ورکشاپ میں سلیم اللہ شیخ صاحب نے مؤثر تحریر۔۔مگر کیسے؟ کے عنوان سے ایک پریزینٹیشن بھی پیش کی- انہوں نے تحریر لکھنے کی ابتدائی نکات کی وضاحت بھی کی۔ سلیم اللہ شیخ کا کہنا تھا کہ “ اچھی تحریر مختصر اور جامعہ ہونی چاہیے ، مشکل الفاظ کے بجائے آسان الفاظ کا استعمال ہو، جس موضوع پر تحریر ہو اپنے موضوع کی وضاحت کرتی ہو۔ تحریر کو پیراگراف میں لکھا جائے تو زیادہ پڑھنے والوں کو متاثر کرتی ہے“۔
 

ورکشاپ میں منیر بن بشیر صاحب نے اپنا مقالہ پیش کرتے ہوئے کہا کہ “ میرا موضوع ہے “ شعوربیدار کرنے میں سوشل میڈیا کا کردار“ اگر اس بارے میں ویب سائٹ کھولیں تو سوشل میڈیا کے بڑے بڑے فائدے نظر آئیں گے- اس سے عام افراد کی معلومات میں اضافہ ہوا ہے- معلومات کا ذخیرہ خود بخود آپ تک پہنچ جاتا ہے - اس سے فوری طور پر اطلاع ایک جگہ سے دوسری جگہ منتقل کی جاسکتی ہے“۔

ان کا مزید کہنا تھا کہ “میں نے دونوں قسم کے معاشروں کی سوشل میڈیا میں لکھا ہے- پاکستان میں کئی اقسام کی سوشل میڈیا ہیں مثلاً موبائی فون کے ایس ایم ایس٬ یو ٹیوب٬ فیس بک٬ ٹوئٹر وغیرہ- لیکن ان سب میں مقبول فیس بک ہے- میں فیس بک کی آمد سے قبل یورپ امریکہ وغیرہ کی ویب سائٹوں میں لکھتا تھا- جب فیس بک آیا تو کہا چلو اس میں بھی غوطہ مار کر دیکھ لیا جائے- میں نے ایک فرق پایا کہ جو کچھ میں کہنا چاہتا ہوں وہ میں پاکستان کی سوشل میڈیا پر آسانی سے نہیں کہہ سکتا - ایک خوف ہے کہ کوئی برا نہ مان جائے - دوسرا میں نے یہ پایا کہ پاکستانی معاشرے میں آپ اتنا جلد اثر نہیں کرتے جتنا ترقی یافتہ ممالک یورپ اور امریکہ کے معاشرے پر اثر کرتے ہیں“-

“ سوشل میڈیا اس وقت زیادہ متاثر کن یا ایفیکٹیو ہوگا جب معاشرہ بھی قبول کر نے کےجراثیم رکھتا ہو - -میں نے دیکھا کہ میں جو بات آگے پہنچانا جا رہا ہوں اسے یورپی قوم کے افراد نے جلدی کیچ کیا یا سمجھیں ان کے ذہن منجمد نہیں تھے-

روزنامہ دنیا نیوز اور جامعہ کراچی شعبہ ابلاغ عامہ کے استاد جناب عابد حسین نے سٹیزن میڈیا کے حوالے سے بات کی انہوں نے کہا کہ “میڈیا نے ایک جانب سہولتیں فراہم کیں تو دوسری جانب اس کے منفی اثرات بھی معاشرے کو بری طرح متاثر کر رہے ہیں“۔
 

محمد ارشد قریشی نے سوشل میڈیا کے لکھاری زبان و بیان پر توجہ دیں کے موضوع پر خیالات کا اظہار کرتے ہوئے کہا کہ “ سوشل میڈیا کی اہمیت سے انکار نہیں کیا جاسکتا بلکہ یوں کہنا بجا ہوگا کہ سوشل میڈیا اب وقت کی ضرور بن چکا ہے ۔ اس حوالے سے ہمارے نوجوان بہت خوش قسمت ہیں کہ دنیا کی جدید ٹیکنالوجی ان کی دسترس میں ہے ، جوں جوں وقت گزرتا جارہا ہے ٹیکنالوجی میں جدت آتی جارہی ہے ۔ الحمداللہ مجھے یہ کہنے میں فخر محسوس ہورہا ہے کہ اب اس جدید دور میں ہم جیسے سرکاری اسکولوں میں پڑھے ہوئے لوگ اپنے بچوں سے موجودہ ٹیکنالوجی کے بارے میں سیکھ رہے ہیں ۔ جب کہ ہمارے والدین اور اساتذہ نے سب سے زیادہ زور خوشخطی سیکھنے پر دیا تھا اور ہم نے بھی کیا کیا جتن نہ کیے خوشخطی سیکھنے کے لیئے دوات بنائی، سرکنڈوں کی قلم اور تختی کی پتائی بڑا محنت طلب کام تھا سوچا تھا کہ اس محنت کا ثمر تمام عمر ہی ملے گا کیا خبر تھی کہ یہ کی بورڈ آکر ساری محنت پر پانی پھیر دے گا-بہرحال وقت کے ساتھ قدم ملا کر چلنا تو پڑے گا ورنہ دنیا آگے نکل جائے گی اور ہم پیچھے رہ جائیں گے۔

ان کا مزید کہنا تھا کہ “ سوشل میڈیا لکھاری خود سے ہی ضابطہ اخلاق بنالیں تو یقیناً اس کے اچھے نتائج آئیں گے ۔ دنیا بھر میں بہت سی ویب سائیٹ ہیں جنہوں نے ضابطہ اخلاق نہ صرف بنائے ہوئے ہیں بلکہ ان پر سختی سے عمل پیرا بھی ہیں ، اس کے باوجود سوشل میڈیا پر لکھنے والوں کی ایک بہت بڑی تعداد ایسی بھی موجود ہے جنہوں نے خود اپنے بلاگ سائٹ یا ویڈیو بلاگ چینلز بنائے ہوئے ہیں جہاں ان کی تحریر کسی بھی ایڈیٹنگ یا سنسر کے مراحل سے نہیں گزرتی وہ براہِ راست شائع اور نشر کردئیے جاتے ہیں ۔ ایسے دوستوں کو بہت زیادہ اپنے کلام و بیان اور تحریر پر توجہ دینے کی ضرورت ہے ، کوئی بھی ایسی تحریر یا ویڈیو بلاگ جس میں عمدہ لفظوں کا چناؤ کیا گیا ہوگا وہ نہایت پر اثر ہوگی ۔ جس طرح ہر انسان کا اس معاشرے میں ایک حصہ ہے اسی طرح سوشل میڈیا پر لکھنے والے اس معاشرے پر بہت زیادہ اثر انداز ہوتے ہیں اس لیئے ضروری ہے کہ سوشل میڈیا کی طاقت کو مثبت کاموں کے لیے استمال کریں اور اس کے لیئے نہایت ضروری ہے کہ آپ کے بولنے اور لکھنے کا انداز خوبصورت اور با اخلاق ہو، اگر آپ اچھا لکھیں گے تو اس کا اثر براہِ راست معاشرے پر ہوگا معاشرہ اچھا ہوگا تو قوم اچھی بنے گی قوم اچھی ہوگی تو حکمران اچھے چنے جائیں گے حکمران اچھے ہونگے تو ملک ترقی کرے گا اور ملک ترقی کرے گا تو اس کا ثمر ہم سب کو خوشحالی کی صورت ملے گا“۔