خریدنے سے پہلے کپڑوں کی کوالٹی پہچاننے کے آسان طریقے

آخر یہ عورتیں بازاروں کے چکر کیوں لگاتی ہیں؟ کپڑوں کی تلاش میں آخر یہ ایک بازار سے دوسرے بازار کیوں پھرتی رہتی ہیں؟ اکثر یہ سوال پاکستان مردوں کے ذہنوں میں گردش کرتے رہتے ہیں- جب یہی سوال عورتوں سے پوچھا گیا تو بیشتر نے “ اعلیٰ معیار کے کپڑوں “ کی تلاش کو اصل وجہ بتایا-

زیادہ تر عورتیں کپڑوں کی اعلیٰ کوالٹی کو ترجیح دیتے ہوئے خریداری کرتی ہیں- مگر ہم میں سے کئی لوگ ابھی بھی یہ سمجھنے سے قاصر ہیں کہ آخر بازار میں موجود کپڑوں کو دیکھ کر کیسے اندازہ لگائیں کہ یہ معیاری ہیں یا نہیں؟

آئیے ہم آپ کی مدد کرتے ہیں:
 

خود دیکھ کر فیصلہ کریں
بازاروں کے چکر لگا کے اور مختلف قسم کے کپڑے دیکھ کر ان کی کوالٹی کے بارے میں رائے ضرور قائم کی جاسکتی ہے- ضروری نہیں کہ ایک ہی دکان میں آپ کو اپنی پسند کا مطلوبہ لباس مل جائے- لہٰذا 2 یا 4 دکانوں میں جا کر کپڑوں کا جائزہ لیں اور ان کی کوالٹی کو مدنظر رکھتے ہوئے خریدنے کا فیصلہ کریں-

متوازن کوالٹی کے کپڑے کو ترجیح دیں
اگر سوٹ کے کپڑے میں کئی قسم کا فیبرک لگا ہو تو اس بات کا خیال رکھیں کہ وہ صحیح سے مکس ہوا ہے یا نہیں- مثال کے طور پر اگر سوٹ لان اور کاٹن مکس فیبرک سے بنا ہے تو دونوں کی متوازن مقدار ہی سوٹ کو آرام دہ بنا سکتی ہے- اسی طرح اگر آپ 100 فیصد کاٹن کا ڈریس خرید رہے ہیں تو یہ بہترین انتخاب ہے مگر 60 فیصد کاٹن اور 40 فیصد synthetics material سے بننے والا سوٹ بھی اچھی پسند ثابت ہوسکتی ہے-

نقالوں سے ہوشیار رہیں
کپڑے خریدتے ہوئے اس بات کی تسلی کر لیں کہ اس کے بنانے والے قابلِ بھروسہ ہیں- اچھی کوالٹی کے برانڈ یا دکانوں سے ہی خریداری کریں- مختلف جعلی برانڈ مارکیٹ میں کھلے عام موجود ہوتے ہیں٬ لہٰذا خریداروں کو ان کی صحیح سے پہچان کر لینی چاہیے اور صرف معیاری برانڈز سے ہی خریداری کرنی چاہیے-