عیدالفطر٬ سچی خوشی کا حصول کیسے ممکن ہے؟

عید الفطر ایک ایسا اسلامی تہوار ہے جس کا دنیا بھر کے مسلمانوں کو شدت سے انتظار ہوتا ہے- مسلمان اس تہوار کا استقبال انتہائی جوش و خروش اور گرمجوشی کے ساتھ کرتے ہیں- ہمیں عید کے اس خاص موقع پر چند ایسی مثبت سرگرمیاں سرانجام دینی چاہئیں جو ہماری عید کی خوشیوں میں کئی گنا اضافے کا سبب بن سکتی ہیں- آئیے ہم آپ کو تفصیل سے بتاتے ہیں:

اولڈ ہوم اور یتیم خانوں میں وقت گزاریں
عید صرف نئے اور خوبصورت کپڑے پہننے٬ عیدی وصول کرنے اور سیلفی لینے کا نام نہیں! اگر حقیقی خوشی چاہتے ہیں تو اپنی خوشیوں میں دوسروں کو بھی شریک کیجیے- عید کے دن اپنا کچھ وقت یتیم خانوں اور اولڈ ہومز کے لیے وقف کیجیے اور وہاں موجود بزرگ افراد اور بچوں کے ساتھ وقت گزاریے- یہ وہ لوگ ہیں جو مشکلات کا شکار ہیں اور انہیں ہمارے ساتھ اور حوصلہ افزائی کی ضرورت ہے- عید کے پرمسرت موقع پر ہم سب کو ضرور ان جگہوں پر جانا چاہیے تاکہ یہ غموں اور دکھوں سے چور افراد اپنی اداسی بھول کر ہمارے ساتھ کچھ لمحات خوشی کے گزار سکیں-

ضرورت مندوں کو عیدی اور تحائف دیں
ہم سب اپنے بڑوں سے ملنے والی عیدی پر خوشی کا اظہار کرتے ہیں اور یقیناً یہ اس موقع کی سب سے بڑی خوشی ہوتی ہے- لیکن آپ اس موقع پر ضرورت مند اور مستحق افراد کو یاد رکھ کر اپنی اس خوشی کو دوگنا بھی کرسکتے ہیں- جی ہاں عید کے موقع پر ایسے افراد کو تحائف یا نقد رقم دیجیے جو ضرورت مند یا محتاج ہیں- آپ کا یہ نیک عمل ان لوگوں کے چہروں پر مسکراہٹ لے آئے گا جسے دیکھ کر آپ کی خوشی بھی پہلے سے زیادہ ہوجائے گی-

ناراض رشتہ داروں کو منائیے
عید ایک بہترین وقت ہے اپنے ناراض رشتہ داروں یا دوستوں کو منانے کا- اس بات کا انتظار مت کیجیے کہ وہ آگے بڑھیں بلکہ خود آگے بڑھ کر انہیں گلے لگائیے اور غلط فہمیاں دور کیجیے- اﷲ تعالیٰ معاف کرنے والوں اور تعلق جوڑنے والوں کو پسند کرتا ہے- یقین جانیے آپ کے اس عمل سے نہ صرف عید کی خوشیاں دوبالا ہوجائیں گی بلکہ یہ عید ہمیشہ کے لیے ایک خوشگوار یادگار میں تبدیل بھی ہوجائے گی- اپنے دوستوں اور رشتہ داروں کے درمیان محبت اور خوشیوں کو پھیلائیے-

عید کے پکوان سب کے لیے
عید بغیر مزیدار کھانوں کے نامکمل ہے- ہم عید کے موقع پر مہمانوں اور اپنے گھر کے افراد کے لیے کئی اقسام کے مزیدار کھانے تیار کرتے ہیں جن میں شیر خورمہ٬ بریانی٬ قورمہ٬ اور کڑاہی شامل ہوتے ہیں- اس سال ان کھانوں کی مقدار کو تھوڑا بڑھا دیجیے اور انہیں اپنے ملازمین٬ پڑوسیوں اور ضرورتمندوں میں بھی تقسیم کیجیے- اور اس خوبصورت خدمت میں اپنے ساتھ اپنے دوستوں اور گھر والوں کو بھی شامل کیجیے -

اچھے کاموں کا سلسلہ شروع کریں
لوگوں کی مدد کرنے اور عطیات دینے کا کوئی مخصوص وقت نہیں ہوتا- البتہ عید ایسے کام سرانجام دینے کا ایک بہترین موقع ضرور ہے جب آپ اپنے ایسے مسلمان بہن بھائیوں کی دل کھول کر مدد کرسکتے ہیں جو مالی پریشانی کا شکار ہیں- غرباﺀ اور ضرورت مند افراد کو عطیات دیجیے اور اس سرگرمی کے لیے اپنے دوستوں اور رشتہ داروں کو بھی آمادہ کیجیے کہ وہ بھی اپنی استطاعت کے مطابق مستحقین کی مدد کریں-