اِن کامیاب 10 بالی ووڈ اسٹارز نے شہرت سے پہلے کیسا وقت دیکھا؟

کامیاب لوگوں کے پیچھے ان کی جدوجہد کی متاثر کن داستانیں چھپی ہوتی ہیں- انہیں داستانوں سے پتہ چلتا ہے کہ یہ کامیاب لوگ کیسے امیر اور مشہور ہوئے؟ ان کی کامیابی میں سب سے اہم کردار ان کی محنت اور لگن کا ہوتا ہے-

نواز الدین صدیقی
معروف بالی ووڈ اسٹار نواز الدین صدیقی بھارتی ریاست اتر پردیش کے علاقے مظفر نگر میں پیدا ہوئے- انہوں نے کیمسٹری میں گریجویشن کی جس کے بعد یہ بطور کیمسٹ اپنی خدمات سرانجام دینے لگے- لیکن جلد ہی نواز الدین نے یہ کام چھوڑ کر ایکٹنگ کورس کے لیے دہلی میں واقع ڈرامہ اسکول کا رخ کر لیا-بے انتہا کوششوں کے بعد نواز الدین فلمی دنیا میں اپنی ایک الگ پہچان بنانے میں کامیاب ہوئے-

شاہ رخ خان
شاہ رخ خان اس بات کا متعدد بار تذکرہ کر چکے ہیں کہ جب وہ ممبئی آئے تو ان کے پاس کھانے کے بھی پیسے نہیں تھے- یہاں تک کہ وہ کئی روز تک اوبرائے ہوٹل کے قریب سڑکوں پر رات کو سوتے- شاہ رخ خان اور ان کے دوست ہوٹل کا ہی واش روم استعمال کرتے اور ایسے ظاہر کرتے جیسے وہ اسی ہوٹل میں رہائش اختیار کیے ہوئے ہیں-

اکشے کمار
ملازمت کے طور پر اکشے کمار فوٹو شوٹ میں اپنے ایک فوٹوگرافر دوست کی مدد کیا کرتے تھے- اکشے کمار دوستوں فلیٹ کی خرید و فروخت کے سلسلے میں مدد بھی فراہم کرتے تھے جس کے عوض وہ کمیشن لیتے تھے-

دھرمیندر
اس معروف اور تجربہ کار فنکار نے بھی کئی سال مشکلات کے ساتھ گزارے ہیں- یہاں تک کہ ایک وقت ایسا بھی تھا جب ان کے پاس کھانے کے لیے بھی پیسے نہیں ہوتے تھے- ایک موقع ایسا بھی آیا جب دھرمیندر کے پروڈیوسر نے ٹیکسی کا کرایہ ادا کرنے سے انکار کر دیا جس پر یہ فنکار شدید پریشان ہوگیا- اس کے بعد ششی کپور انہیں اپنے گھر لے گئے جہاں دھرمیندر نے ششی کے ساتھ ہی دن کا کھانا بھی کھایا-

دیو آنند
مشہور و معروف بالی ووڈ فنکار دیو آنند فلموں میں آنے سے قبل ایک کمپنی میں کلرک کی ملازمت کیا کرتے تھے- وہاں ان کی تنخواہ ماہانہ صرف 85 روپے تھی-

امیتابھ بچن
میگا اسٹار امیتابھ بچن نے بھی ماضی میں چند راتیں ممبئی شہر کی سڑکوں پر سو کر گزاری ہیں- یہ وہ دن تھے جب وہ اپنے آپ کو منوانے کی کوششوں میں تھے- آج کے معروف فنکار کو ماضی میں ایک ریڈیو کمپنی نے بھی مسترد کر دیا تھا- یہاں تک کہ انہیں آڈیشن کے لیے دوبارہ موقع بھی فراہم نہیں کیا گیا-

مادھوری ڈکشٹ
انہوں نے جب فلمی دنیا میں قدم رکھا تو انہیں کافی منفی رائے اور تبصروں کا سامنا کرنا پڑا- انڈسٹری پر راج کرنے والی میناکشی شیشادری بھی ان لوگوں میں شامل تھیں جو سمجھتے تھے کہ مادھوری کبھی کامیاب نہیں ہوسکتی-

گووندا
یہ وہ فنکار ہے جو Virar کے ایک چھوٹے سے فلیٹ میں رہتا تھا اور روز راجیشری اسٹوڈیو جاتا تھا- لیکن انہیں یہ کہہ کر واپس لوٹا دیا جاتا تھا کہ وہ ابھی کم عمر ہیں- لیکن گووندا مایوس نہیں ہوئے اور کوششیں جاری رکھیں- یہاں تک کہ وہ اپنا نام پیدا کرنے میں کامیاب ہوگئے-

منوج واجپائی
انہوں نے بھی خالی جیب کے ساتھ ایک وقت دیکھ رکھا ہے- اس وقت منوج واجپائی نے صرف 2000 روپے فی قسط کے حساب سے ڈرامہ سیریل میں فنکاری کا معاہدہ کیا-