جشنِ آزادی اور ہماری ویب کی 11ویں سالگرہ

پاکستانی انٹرنیٹ صارفین کو ایک اعلیٰ اور معیاری ویب سائٹ کا عزم لیے٬ ہماری ویب آج اپنے 11 سال مکمل کرنے کو ہے- 14 اگست 2007 کو متعارف کروائی جانے والی یہ ویب سائٹ٬ ہر سال جشنِ آزادی کے ساتھ اپنی سالگرہ کو ایک مضبوط ارادے اور مقصدیت کے ساتھ مناتی ہے- جس میں ہماری ویب اپنے آپ کو اپنے پاکستانی کلچر٬ معاشرتی اقدار اور اپنی قومی زبان اردو کی ترقی اور ترویج کا امین سمجھتی ہے-
 

گزشتہ 11 سالوں میں ہماری ویب نے بتدریج ترقی کی جو کہ آغاز میں صرف ایک خواب کی مانند دکھائی دیتی تھی لیکن اس خواب کو ہماری ویب کی ٹیم کی مسلسل محنت اور کاوشوں کے ساتھ ساتھ ہمارے انٹرنیٹ یوزرز (صارفین) کی بھرپور شرکت اور حوصلہ افزائی نے حقیقت میں تبدیل کردیا- اور انہی کاوشوں نے اس ویب سائٹ کو نہ صرف پاکستان بلکہ دیگر ممالک میں بھی ایک مقبول ویب سائٹ کے درجے پر پہنچا دیا ہے-

ہماری ویب نے اس تمام عرصے کے دوران اردو زبان کی ترقی کے لیے بھی بے پناہ خدمات سرانجام دی ہیں اور یہی وجہ ہے کہ اس وقت ہماری ویب پر کالم نگار اور شعراﺀ حضرات کی تعداد ہزاروں میں ہے جبکہ ان کی تحریروں کی تعداد لاکھوں میں ہے- اس کے علاوہ ان کالم نگار اور شعراﺀ حضرات کی حوصلہ افزائی کے لیے ایک رائٹرز کلب بھی قائم کیا گیا ہے جسے “ ہماری ویب رائٹرز کلب “ کا نام دیا گیا ہے اور یہ آن لائن لکھنے والوں کا پہلا کلب ہے-