چند خطرناک غلطیاں مردوں کو ہرگز نہیں کرنی چاہئیں

ہمارے معاشرے میں مردوں کو ہی کماؤ پوت اور مضبوط جنس مانا جاتا ہے جس کے اوپر پورے خاندان کی کفالت کی ذمہ داری کے ساتھ ساتھ اس کی حفاظت بھی کرنا ہوتا ہے اس کا مطلب یہ ہے مرد گھر کی بنیاد ہوتا ہے تو اس کا صحت مند اور تندرست ہونا ضروری ہے۔ مرد حضرات اپنی زندگی میں جانے انجانے میں کچھ ایسی غلطیاں سر انجام دے رہے ہیں جو مستقبل میں ان کے لئے بہت خطرناک ثابت ہوسکتی ہے۔اگر آپ مرد ہیں اور جاننا چاہتے ہیں کہ وہ غلطیاں کیا ہے تو یہ پڑھئے۔
 

ڈاکٹر سے دور بھاگنا:
عام مشاہدہ ہے کہ ڈاکٹر کے پاس جانےسے انکاری ہونا تو مردوں کی جنیات میں شامل ہے، اگر کچھ عرصے میں چند کلو وزن بڑھ جائے تو کیا ہوا کوئی مسئلہ تھوڑی ہے تھوڑی سی ایکسر سائز کرنی ہے اور معاملہ سیٹ ۔اور اگر جسم میں درد ہے تو کیا ہوا؟ مرد کو درد تھوڑی ہوتا ہے ! ویسے یہ باتیں سننے میں تو بہت اچھی لگتی ہیں لیکن کچھ سالوں بعد یہ ہی درد آپ کی صحت پر بہت برے اثرات ڈالے گا تو آپ اس وقت کچھ نہیں کرپائیں گے اور پھر آپ کی صحت بہت تیزی سے خرابی کی طرف جائے گی ۔لہٰذا، مشورہ یہ ہی ہے کہ طبیعت زیادہ خراب ہونے کا انتظار نہ کریں اور معالج کے سامنے طبی مسئلہ بیان کریں۔

دل کا دورہ کیا صرف عمر رسیدہ افراد کو پڑتا ہے؟
یہ بات جاننے کے باوجود کہ یہ جان لیوا بیماری ہمارے خاندان میں موجود ہے لیکن اس کے باوجود مانتے ہیں کہ یہ صرف عمر رسیدہ افراد کو ہوتی ہے ۔ یہ بات مردوں کو ماننی پڑے گی کہ یہ مسئلہ 30 سال کی عمر میں بھی ہوسکتا ہے ۔ تو اس معاملے میں احتیاط برتی جائے اور اگر خاندان میں کارڈیک کے مسئلے سے دوچار لوگ موجود ہیں آپ کو اس معاملے میں احتیاط برتنی چاہئے ۔یہ مسئلہ عام طور پر مردوں میں 50 سال کے بعد اور عورتوں میں 60 سال کے بعد سامنے آتا ہے ۔

سن اسکرین سے اجتناب کیوں؟
بہت سے مردوں کا خیال ہے کہ چہرے پر کچھ لگانا مردوں کی توہین ہوتی ہے اور یہ تو صرف عورتیں لگاتی ہیں۔ لیکن شاید آپ کو یہ معلوم نہیں کہ سورج کی خطرناک شعائیں آپ کو اسکن کینسر میں مبتلا کرسکتی ہیں۔ مردوں کو مشورہ ہے کہ باہر نکلنے وقت ایس پی ایف 30 کی اشیاء استعمال کریں تاکہ خطرناک شعاعوں سے محفوظ رہیں۔

ذہنی دباؤ٬ یہ کیا ہوتا ہے؟
مرد حضرات اب تک یہ سمجھتے آرہے ہیں کہ ہم ذہنی اور اعصابی طور پر مضبوط ہے تو ہم کسی ذہنی دباؤ کا شکار نہیں ہوسکتے اس میں تو صرف خواتین ہی مبتلا ہوتی ہیں اور یہ عورتوں کے ڈرامے ہوتے ہیں۔ یہ بات مردوں کے لئے نا قابلِ قبول ہے کہ وہ کسی اعصابی دباؤ اور شدید ذہنی مسئلے سے دوچار ہیں اور اس کے نتائج یہ نکلتے ہیں کہ بجائے اس کو بیماری سمجھ کر ڈاکٹر سے رجوع کیا جائے وہ اس مسئلے سے چھٹکارا پانے کے لئے غلط حرکات میں مبتلا ہوجاتے ہیں جن میں سگریٹ نوشی اور منشیات کا استعمال شامل ہے۔