ایک آسٹریلین ٹیکنالوجی کمپنی کی جانب سے ایسی منفرد کشتی ڈیزائن کی گئی ہے جس کے منصوبے پر کام شروع ہوگیا ہے اور وہ کشتی آبدوز کی شکل اختیار کر سکے گی۔
Migaloo نامی کمپنی کی جانب سے یہ جدید آسائش اور فیچرز سے لیس آبدوز تیار کی جا رہی ہے۔
اس سپر یاٹ کو ایم 5 کا نام دیا گیا ہے جس کی لمبائی 165 میٹر جبکہ چوڑائی 23 میٹر ہوگی۔
پانی کی سطح پر وہ 20 ناٹ جبکہ زیرآب 12 ناٹ کی رفتار سے سفر کرے گی۔
مجموعی طور پر وہ 15 ہزار کلومیٹر کا فاصلہ طے کر سکے گی اور کمپنی کے مطابق ہائبرڈ اور کشتی کے اس امتزاج کا بیرونی ڈیزائن دنگ کر دینے والا ہوگا جبکہ اندر سے اسے مالک کی مرضی کے مطابق ڈیزائن کیا جائے گا۔
اس میں ہیلی پیڈ، سوئمنگ پول، جم، آرٹ گیلری، سنیما اور دیگر متعدد سہولیات دستیاب ہوں گی۔
کمپنی نے بتایا کہ سپر یاٹ کے مالکان کی حفاظت کے لیے امریکی کمپنی کے اشتراک سے سکیورٹی سسٹمز کو نصب کیا جائے گا اور یہ کسی قلعے سے کم نہیں ہوگی۔
ابھی اس کی قیمت کے بارے میں تو تفصیلات جاری نہیں کی گئی ہیں مگر تمام تر سہولیات کو مدنظر رکھتے ہوئے خیال ظاہر کیا جا رہا ہے کہ اس کی قیمت 2 ارب ڈالرز سے شروع ہوگی۔
اس کے لیے جدید ترین ٹیکنالوجیز کا استعمال کیا جائے گا تاکہ پانی کے اندر مسافروں کے تحفظ کو یقینی بنایا جاسکے۔
ابھی یہ معلوم نہیں کہ یہ کانسیپٹ سواری کب تک حقیقت کی شکل اختیار کر سکے گی۔